CONCELLO
A adxudicataria da Praza de España arranxará as zonas axardinadas deterioradas pola falta de mantemento A empresa que levou a cabo Urbanización e Remodelación do Entorno da Praza de España arranxará as zonas axardinadas deterioradas pola falta de mantemento dende que concluíu a obra. A Xunta Local de Goberno acordou na reunión de hoxe trasladar a Stradia Infraestruturas o listado de actuacións que deberá realizar, así como o presuposto das mesmas, valoradas en 10.607 euros. A decisión do goberno chega despois das conversas mantidas este verán con responsables da adxudicataria para abordar a situación.
25.09.2017.- A razón pola que debe ser a adxudicataria quen solucione os problemas que se rexistran nas zonas de céspede da Praza de España é que o incumprimento por parte da empresa do compromiso recollido no contrato de asumir o mantemento integral e conservación da zona axardinada durante os 24 meses posteriores ao remate da obra da Praza de España. A empresa nunca materializou o compromiso que ela mesma ofertara como mellora na súa proposta de licitación, e no que se especificaba que o mantemento debía garantir o “estado óptimo• das zonas axardinadas “con especial coidado do crecemento do céspede e podas das árbores, control do seu crecemento despois da poda”, como se recolle no informe que o goberno local encargou ao director da obra.
Segundo consta no informe da dirección de obra, esta falta de mantemento provocou “un exceso de compactación na terra vexetal sobre a que se sementou o céspede, o que propiciou a creación dunha capa impermeable que afoga as raíces ao impedir que as augas superficiais non drenen cara as capas de gravas inferiores”. Esta circunstancia provoca que en épocas de chuvia a zona de céspede se converta nunha lameira e que en períodos secos aparezan calvas que deterioran a imaxe da praza e impiden o completo uso e goce desta céntrica zona de esparexemento. Como consecuencia destes dous anos sen o axeitado mantemento, o técnico conclúe que “faise necesaria unha actuación máis radical e profunda para acadar un substrato permeable que permita a entrada de osíxeno ás raíces e para que o céspede estea en bo estado durante todo o ano”.
As actuacións que deberá realizar Stradia segundo o informe do técnico consisten en: Retirar a capa de terra vexetal excesivamente compactada e soterrar uns 8 centímetros os pozos centrais que, debido á compactación do terreos, non se sitúan á cota máis baixa e, polo tanto, non poden actuar como sumidoiros das augas superficiais.
Tamén terán que subministrar, estender e nivelar unha capa de 10 centímetros de grosos de area de río limpa e cribada que garanta a permeabilidade do conxunto das raíces e, por último, terán que sementar céspede fino de gramíneas resistente á sombra, asumido ademais os traballos de desbroce, perfilado e fresado do terreo, distribución do fertilizante, pase de rulo e primeira rega. O acordo adoptado hoxe pola Xunta de Goberno será remitido canto antes á empresa para que acometan os traballos. De non facelo nun prazo prudencial, executaraos o Concello a través do aval depositado no seu día por Stradia.