VILAGARCIA DE AROUSA

URBANISMO
O Concello require a 12 bares a retirada dos paraventos colocados nas terrazas sen arreglo a licenza
O Concello require a 12 bares da cidade a retirada dos paraventos e lonas laterais colocados nas terrazas sen arreglo a licenza. Esta é a primeira das resolucións da Alcaldía que emanan da circular remitida o 25 de febreiro a máis dun centenar de hostaleiros para instalos a presentar os proxectos e solicitudes de licenza para a instalacións de terrazas e toldos no dominio público. Os 12 locais notificados hoxe disporán de prazo ata as 14:00 horas de mañá, mércores, 16 de abril, para acatar a orde da Alcaldía namentres non continúa o procedemento administrativo de obtención dos permisos.

15. 04. 2014.- Os requirimentos que comezaron a notificarse hoxe mesmo responden a instalacións colocadas nuns casos sen contar coa preceptiva licencia e noutros por exceder as condicións autorizadas. Ademais de ordenar a inmediata retirada de paraventos e lonas laterais, o Concello require aos propietarios que conten con permiso para a instalación de toldo que axusten o mesmo aos parámetros estritamente autorizados tanto en extensión como en número de elementos.

A resolución da Alcaldía advirte aos afectados que en caso de non acatar o mandato no prazo fixado, procederase á execución forzosa da mesma mediante a imposición de multas coercitivas na suma que prevé a lei.

De acordo coa Lei de Emprendedores, a ocupación de solo público está suxeita á concesión previa do permiso municipal. Esta ocupación é extensible ademais ao voo e ao subsolo, segundo recolle expresamente a Lei do Solo, e calquera instalación nestes espazos debe rexerse pola normativa municipal. Por outro lado, a instalación de paraventos, lonas laterais, toldos e demais elementos sen contar con licenza ou excedendo o permitido, supón un acto de clara competencia desleal en detrimento dos hostaleiros que si cumpren as normas.

Independentemente da resolución ditada hoxe -que podería ter continuidade en función das inspeccións realizadas e o estudio da documentación existente- o Concello continuará co procedemento administrativo, estudando os proxectos presentados nos últimos meses polos hostaleiros e que serán convenientemente ditaminados conforme á normativa pola Comisión de Seguimento de Terrazas, da que forman parte o goberno local, os técnicos do Concello e a Asociación de Hostalería e Iniciativas Turísticas, Ahituvi.