VILAGARCIA DE AROUSA

CONCELLO
Pista libre para a reforma do parque do Cavadelo e a construción do novo skate
A esperada reforma do parque do Cavadelo e a construción do novo skate arranca definitivamente o luns, 13 de maio. Con certo retraso sobre as datas inicialmente previstas, pero coa total garantía de que a estrutura do parking soportará a actuación proxectada, os operarios da adxudicataria, Prace Servicios y Obras, comezan o luns a desmontar a pérgola e os equipamentos existentes no parque co obxectivo de despexar a zona sobre a que se desenvolverá o proxecto que transformará por completo este céntrico espazo público de Vilagarcía. O Concello inviste 373.155 euros na actuación que se financia cunha achega do Plan Concellos da Deputación e con fondos municipais.

08.05.2024.- Como xa se informara no seu día, a reforma do parque do Cavadelo pospúxose cando estaba a piques de iniciarse co obxectivo de certificar que a intervención a realizar non afectaría á cuberta do aparcamento soterrado -sobre a que se empraza o parque- e que a estrutura deste soportaría o peso dos elementos de formigón que se van introducir no skate. Aínda que o proxecto fíxose tendo en conta o proxecto orixinal do parking, considerouse oportuno realizar os estudos pertinentes por si dende a súa construción, hai tres décadas, puideran ter variado os límites de resistencia. En consecuencia, o Concello encargou a realización das probas de carga e o estudo de cálculos de estruturas que se contrastaron co proxecto a executar. Os informes técnicos son favorables e, por conseguinte, a obra pode comezar con todas as garantías.

Con esta actuación o goberno de Vilagarcía cumpre dous obxectivos, renovar un parque que se atopa moi degradado polo uso e o paso do tempo, e atender unha demanda dos usuarios das instalacións deportivas, con cuxa opinión se contou á hora de deseñar o proxecto do novo skate park.

A intervención que comeza o luns adaptará o parque á estética e aos requirimentos do século XXI, converténdoo nunha gran área de encontro e convivencia entre os deportes urbanos e a cidadanía. Pensando nos primeiros, a actuación prevista inclúe instalacións perfectamente equipadas e seguras destinadas á práctica de disciplinas como o skate, o parkour, o break dance e o BMX. Cada modalidade deportiva contará cunha área propia para a súa práctica, dotada de equipamentos e infraestruturas específicas, orientadas cara o centro do parque para favorecer a comunicación e interacción social entre practicantes das distintas disciplinas e tamén entre o público e os transeúntes. Os arquitectos tamén tiveron en conta os materiais a utilizar en cada unha destas áreas deportivas, optando polos máis axeitados para a súa práctica.
Ademais, manterase unha cancha de baloncesto e, por petición veciñal, habilitarse outra de fútbol.

Por último, o proxecto dará maior presenza ás zonas verdes e aos espazos de recreo para que a cidadanía poida gozar delas á vez que achegarse a coñecer estes deportes. Para evitar o que sucede actualmente -que os peóns bordeen o parque para chegar á zona do Centenario- crearanse corredores que animen a pasar e a permanecer tamén no Cavadelo.