VILAGARCIA DE AROUSA

RELACIÓNS INSTITUCIONAIS
Alcalde e subdelegado do Goberno coinciden en que Vilagarcía debe contar cun cuarto xulgado
O alcalde de Vilagarcía, Alberto Varela, e o subdelegado do goberno central na provincia, Abel Losada, coinciden en que Vilagarcía debe contar con cuarto xulgados e, polo tanto, creen que a Xunta debe de incluír esta cuestión como prioritaria nas súas negociacións coa Administración do Estado á hora de definir o mapa xudicial. Na súa primeira visita institucional a Vilagarcía, Losada e Varela tamén abordaron outros asuntos de moito interese local, como a reforma e humanización da estrada N-640 e a rexeneración dos areais.

21.02.2024. Na comparecencia trala reunión de traballo, o subdelegado do Goberno subliñou que a súa labor “básica” é intermediar entre os Concellos e o executivo central, de aí a comunicación constante cos alcaldes, que son os que coñecen e lideran os proxectos máis importantes para as súas cidades. Neste sentido, Losada citou tres actuacións pendentes en Vilagarcía que ocuparon a maior parte da xuntanza. En primeiro lugar, a reforma integral da N-640 no seu tramo final, dende Ande, preto do hospital, ata a praza de Constitución, incluíndo por tanto toda a chamada “recta de Rubiáns”. Losada indicou, ao respecto, que Vilagarcía, como tantas outras cidades, foi “torturada” durante décadas pola presenza das infraestruturas que a atravesan; hoxe, engadiu, é preciso reverter esta situación si se quere mellorar a mobilidade sostible.

Outra das accións previstas polo Goberno en Vilagarcía é a rexeneración das praias. A programada para os areais da Concha e Compostela comezará en abril, á volta da Semana Santa, pero o alcalde xa advertiu que O Campanario, en Bamio, e O Preguntoiro, en Vilaxoán, tamén precisan de intervención, algo ao que Abel Losada asumiu, para lembrar que o coidado do medioambiente é un dos eixos da acción política do goberno de Pedro Sánchez. O subdelegado incluso foi máis alá para recalcar que esa protección do medioambiente ten tamén unha vertente económica, en canto atinxe ao desenvolvemento turístico da cidade.

A terceira gran cuestión abordada por Alberto Varela e Abel Losada foi a dos xulgados e a súa variante: o solar que posúe o Estado tralos edificios que no Cavadelo acollen a comisaría de Policía Nacional, por unha banda, e as salas de xustiza e o rexistro civil, pola outra. Tanto o alcalde como o subdelegado coincidiron en que é necesario crear a cuarta sala, unha demanda que ten tras de si moitos anos de reivindicacións. Por iso, consideran que a Xunta debería de ter en conta esta demanda á hora de negociar co Estado o desenvolvemento da planta xudicial en Galicia. Ao fío, o alcalde pediu ao subdelegado que transmita ao Goberno o que xa dixo noutros ámbitos e por outros medios: a necesidade de que o Estado renuncia a vender a parcela do Cavadelo porque chegado o momento será precisa para ampliación da actual sede xudicial.