MEDIO AMBIENTE
Seis metros de raíces taponaban a canle que conduce a auga do manancial que alimenta a fonte do Coruxo A auga xa volve a manar polo caño da fonte do Coruxo, en Cornazo, e o lavadoiro situado ao pé da estrada que leva a Lobeira xa luce cheo do líquido elemento. A vella fonte, seca dende hai xa un tempo, recupera así a normalidade despois de que o caudal de auga fora reducíndose gradualmente ata cesar por completo. A causa da misteriosa desaparición do líquido foi descuberta onte polos operarios do servizo Municipal de Medio Ambiente: Seis metros de grosas raíces dunha árbore que taponaban a canle que alimenta a fonte dende o manancial situado no monte.
22.04.2022.- O arranxo do problema levou o seu tempo xa que os operarios municipais tiveron que ir levantando varios tramos do conduto que vai dende a mina de auga ata a fonte ata dar co punto xusto da obturación. Unha vez atopada a causa, procederon á retirada e limpeza da canle co que a auga do manancial volveu a percorrer o seu camiño habitual cara o caño da fonte situada ladeira abaixo, ao pe da estrada. En total retiráronse uns 6 metros de raíces duns 8 centímetros de diámetro que se enmarañaban no tubo ata obstruílo por completo.
Os traballos remataron coa limpeza do fondo do lavadoiro que xa presenta un bo nivel de auga.