POLICÍA LOCAL
A Policía Local cursou 135 denuncias por incumprimento das normas anti COVID nas últimas sete semanas As labores de vixilancia sobre o cumprimento das normas sanitarias que está levando a cabo a Policía Local de Vilagarcía saldouse coa imposición de 135 denuncias en algo menos das sete semanas comprendidas entre o 25 de outubro, día no que se decretou o confinamento horario entre as 23.00 e as 06.00 horas, e o 10 de decembro. A maior parte das infraccións por incumprir a normativa anti COVID tiveron como causa saltarse o toque de queda ou os horarios de peche establecidos nas respectivas fases das restricións, instruíndose tamén procedementos sancionadores por non levar a máscara, ou non respectar as distancias de seguridade.
18.12.2020.- Das 135 denuncias tramitadas no período sinalado, 61 correspondéronse a saltarse ao toque de queda e os horarios de peche de establecementos hostaleiros. No bloque das 74 restantes atópanse causas como saltarse o peche perimetral sen causa xustificada, algunha de establecemento hostaleiro con clientes consumindo na barra ou no interior do local, cando non se permitía esta opción, por non levar posta a máscara, por permanecer fumando nas portas de bares e por non gardar as distancias de seguridade entre persoas reunidas na rúa ou en terrazas.
De cara ás vindeiras celebracións de Nadal, a Policía Local extremará as labores de vixilancia e control das normas sanitarias, especialmente nos días festivos e as súas vésperas.