AVISOS
Péchase temporalmente o parque do Castriño debido a un desprendemento de terra O Concello de Vilagarcía ordenou este mediodía o peche temporal do parque do Castriño tras producirse un desprendemento de terra na zona da pasarela que da acceso ao xardín botánico dende a parte máis elevada do parque. O escorregamento de terra, provocado polo embrandecemento do terreo a causa das chuvias, deixou en suspensión a pasarela, razón pola que se precintan os accesos á zona de recreo como medida preventiva ata que se poida garantir a seguridade na zona.
05.03.2020.- Dada a importancia do movemento de terras, o Concello enviará a técnicos municipais a avaliar a situación e, de ser o caso, determinen as actuacións a adoptar para asegurar a pasarela e o resto dos accesos, especialmente nas zonas das terrazas que rexistran importantes desniveis.
Mentres non se executan as medidas pertinentes, o Concello prega aos cidadáns que respecten os precintos para evitar calquera risco, tanto na zona afectada, como nas demais que poidan presentar problemas de inestabilidade, ata que non estea perfectamente garantida a seguridade.