CULTURA
Teatro do Noroeste transformará o Auditorio nun aloucado xeriátrico coa comedia “As Virxes Salvaxes” A compañía Teatro do Noroeste abre este sábado, 15 de febreiro, a nova tempada de teatro galego no Auditorio e farao con “As Virxes Salvaxes”, unha comedia que aborda a necesidade da sociedade actual de recluír aos maiores en centros especializadas onde ss estean atendidos e acompañados. O espectáculo comeza ás 21.00 horas e as entradas xa se poden adquirir anticipadamente (máis custes de xestión) a través de ataquilla.com ou no teléfono 902504500 ou o día da función na billeteira do Auditorio a partir das 19:00 horas.
11.02.2020.- “As Virxes Salvaxes” forma parte do ciclo de teatro financiado a través do Concello de Vilagarcía e a Agadic no marco da programación da Rede Galega de Teatros e Auditorios. Escrita e dirixida por Eduardo Alonso, “As Virxes Salvaxes” é unha “aloucada comedia xeriátrica” protagonizada por Ana Santos, Elina Luaces, Luma Gómez, Manuela Varela, Rosa Álvarez, Fernando González, Miguel Pernas e Inma António.
Sinopse:
A obra debuxa unha realidade da sociedade actual que non sempre foi necesaria: a absurda pero necesaria situación de recluír aos nosos maiores en institucións que os atendan e coiden. Non sempre foi así. Nas culturas rurais, os maiores tiveron sempre unha función, unha ocupación que daba sentido as súas vidas ata o final. Máis chegaron as presas e os apuros da cultura urbana e nela, os maiores non teñen cabida, son un estorbo, é preciso desfacerse deles amoreándoos en institucións concibidas para iso. Nunha destas institucións, varias internas realizan, mesmo sen sabelo nin pretendelo, a súa propia revolución. Dalgún xeito, este espectáculo é unha homenaxe, se cadra un algo irreverente, aos nosos maiores máis revoltosos. Bonificacións: A Concellería de Cultura ofrece prezos bonificados nas entradas a colectivos de desempregados, maiores de 65 anos e mocidade, que poderán adquirir a localidade a 3 euros acreditando a súa condición de beneficiario presentando a tarxeta de desemprego, DNI e carné xóven, respectivamente.