CULTURA
A concelleira de Cultura representa a Vilagarcía na Asociación de Entidades Locais pola Lingua A concelleira de Cultura e Normalización, Sonia Outón, representa ao Concello de Vilagarcía no seo da Asociación de Entidades Locais pola Lingua que constituíu este mediodía en Santiago de Compostela. Vilagarcía é un dos 16 municipios de Galicia que conforman esta nova entidade, que nace en resposta da necesidade de colaboración e coordinación entre municipios para poder desenvolver iniciativas e programas tendentes a garantir o uso da lingua galega no eido das administracións locais, e a potenciar o seu emprego en todos os planos da vida pública, cultural e informativa.
15.02.2019.- Participando nesta nova asociación, o Concello de Vilagarcía volve a poñer de manifesto o seu absoluto compromiso coa defensa do galego. De feito, a adhesión á entidade foi aprobada polo Pleno da Corporación Municipal na sesión do pasado mes de novembro.
Ademais da concelleira de Cultura como representante da Corporación, o Concello de Vilagarcía tamén conta na asemblea cun representante técnico, neste caso o responsable do Servizo de Normalización.
Para contribuír no financiamento das iniciativas que se promovan desde a asociación, os concellos deberán aboar unha cota anual que se fixa en función ao seu número de habitantes. No caso de Vilagarcía é de 5.000 euros ao ano. Con estes fondos, os colectivo promoverá programas a nivel supramunicipal como o “Apego”, no que tamén participa o Concello e que foi o xerme para a creación desta asociación colaborativa entre entidades para a promoción e normalización do uso da lingua galega.