MEDIO AMBIENTE
O Concello acomete cos seus propios medios a limpeza de cinco regatos do municipio O Concello de Vilagarcía comezou esta semana a executar os traballos de limpeza de varios regatos do municipio. As actuacións foron comunicadas previamente a Augas de Galicia polo que, transcorrido o prazo que establece a lei, os operarios do servizo municipal de Medio Ambiente iniciaron a necesaria labor de mantemento dos leitos fluviais para previr riscos de desbordamentos e inundacións durante a tempada de chuvias. Esta actuación debe completarse coa limpeza dos ríos Con e Leiro que o Concello pediu que asumise Augas de Galicia, seguindo a colaboración e reparto de traballos similar a levada a cabo o ano pasado.
15.11.2018.- Dada a altura do ano na que nos atopamos, os operarios municipais traballan dende o luns na limpeza manual de barios regatos,, Comezaron pola zona de Cornazo de Abaixo, por onde discorre o leito que desemboca no Con á altura de Fexdega e mañá trasladaranse ao río Santa Mariña e, posteriormente ao Lomba, cuxos cursos baixan por Cornazo, Fontecarmoa , A Xunqueira e A Lomba, para desembocar no Con polo parque da Xunqueira. Por último, o departamento que dirixe Lino Mouriño, despexará de maleza os regatos da Tripeira (Giillán), Faxilde e A Torre.
En todos os casos, e tal como se indica nas memorias remitidas a Augas de Galicia a mediados de outubro, as actuacións faranse de xeito manual e consistirán na roza da maleza e a retirada de ramas e restos arrastrados polas correntes, para o cal se utilizarán un par de rozadoras. Dende o servizo municipal de Medio Ambiente confíase en que Augas de Galicia acometa pronto o acondicionamento dos outros dous ríos que faltarían, o Con e o Leiro.