CONCELLO
O goberno entrega aos sindicatos a proposta de catalogación dos postos de traballo O Concello de Vilagarcía retomou este mediodía as negociacións relativas á elaboración e aprobación da RPT. O goberno local reuniuse cos representantes sindicais dos traballadores co obxecto entregarlles a proposta inicial do Catálogo dos Postos de Traballo do Concello elaborado pola empresa Galivalia en base á información recompilada durante a primeira fase dos traballos de elaboración da RPT. As partes volverán a reunirse nas vindeiras semanas para continuar avanzando na negociación.
10.10.2018.- O executivo socialista estivo representado na reunión de hoxe pola voceira, Tania García e a concelleira de Facenda, Luz Abalo. Pola parte sindical acudiron os representantes das catro organizacións presentes no Concello (UGT, CCOO, CIG e CESIF) cos seus respectivos asesores. Tamén participaron no encontro responsables da firma Galivalia.
Os técnicos da adxudicataria foron os encargados de explicar aos representantes sindicais o procedemento e os criterios seguidos para definir cada un dos postos de traballo que existen no Concello de Vilagarcía. Isto fíxose tendo en conta o contido das fichas personais elaboradas por cada traballador sobre as funcións que desempeñan, así como en base aos datos recabados dos xefes de servizo e do propio executivo, en relación ás necesidades e organización dos departamentos.
A elaboración da RPT do Concello de Vilagarcia atópase xa na segunda das tres fases nas que se divide o proceso. Tras entregar copia do catálogo a todos os sindicatos, o executivo local daralles tempo a que o revisen con calma e, de ser o caso, presenten as propostas que consideren oportunas. Unha vez finalizado ese prazo, volverán a reunirse para seguir negociando de cara a obter o documento definitivo consensuado.