XUVENTUDE
O día 1 ábrese o prazo de inscrición no Campamento Urbano Medioambiental para nenos e nenas de 8 a 11 anos A Concellería de Xuventude informa de que o 1 de agosto ábrese o prazo de inscrición no campamento urbano medioambiental para nenos e nenas de 8 a 11 anos de idade. Trátase dunha actividade gratuíta a celebrar entre p 27 e o 31 de agosto que se desenvolverá en diferentes espazos naturais e históricos da localidade co obxectivo de que os participantes aprendan e coñezan mellor o seu entorno, tanto dende o punto de vista natural como cultural.
30.07.2018.- O Campamento consistente nun programa de actividades ambientais, culturais, creativas e lúdicas que se levarán a cabo nas contornas naturais e monumentais do concello de Vilagarcía durante o mes de agosto. Estas actividades están dirixidas a nenos e nenas, mozos e mozas que terán a oportunidade de participar na natureza, da cultura, da tradición oral e da tecnoloxía, o que lles proporcionará unha ampliación dos seus coñecementos sobre o bosque, o mar, a cultura e a historia de Vilagarcía, desenvolvendo as súas habilidades de orientación, autonomía, respecto polo medio ambiente e aproveitamento racional do mesmo.
Entre as excursións previstas están unha visita guiada á Cortegada, territorio do parque Nacional Marítimo Terrestre das Illas Atlánticas; Ruta do marisqueo , visita ao Museo do tren, visita ao Refuxio de Animais de Pinar do Rei e ao castro de Alobre e o Xardín Botánico Enrique Valdés Bermejo. Tamén realizarán actividades nas praias da Compostela-A Concha, ruta de sendeirismo por Xiabre e un obradoiro de instrumentos musicais.
O campamento terá un horario de 10 a 14 horas, excepto o último día, no que está prevista a visita a Cortegada, que será de 10 a 19 horas. O punto de encontro e recollida será sempre no Auditorio. Os participantes van sempre acompañados de monitores e coidadores.
Os interesados en participar neste Campamento Urbano Medioambierntal deben inscribirse entre o 1 e o 13 de agosto presentando a solicitude cuberta, xunto coa documentación especificada na mesma, no Rexistro do Concello, de luns a venres en horario de 8.30 a 13.45 horas. Ofértanse 20 prazas que se cubrirán por orde de inscrición. A lista de admitidos publicarase o día 17 de agosto.
O formulario de inscrición e as bases do campamento están dispoñibles na Concellería de Xuventude e no taboleiro de anuncio desta web.