CULTURA
O blues actualizado de Marcos Coll e Stefano Ronchi soa o sábado no Salón García O blues volverá a soar en Vilagarcía mañá, sábado 21 de abril. Será no Salón García a partir das nove da noite onde os músicos Estefano Ronchi e Marcos Coll presentarán o seu primeiro traballo discográfico en conxunto que leva por título “Street Preachin”. Os que non adquiran a entrada anticipada por ticketea a 8 euros, poderán comprala la propia sala mañá a partir das 19.horas ao prezo de 10 euros.
20.04.2018.- Marcos Coll (harmónica) e Stefano Ronchi (guitarra) son dous coñecidos do público vilagarcián posto que ambos teñen participado de xeito individual en anteriores edicións do Vila Blues, o festival internacional de blues que se celebra no mes de xullo en Vilagarcía.
Mañá, o dúo Ronchi&Coll ofrecerá un concerto en formato acústico para presentar ao público as 10 cancións que compoñen “Street Preachin", un disco que se podería definir como country-blues, un estilo antigo e conmovedor que se achega á mellor das tradicións bluseiras mesturándoa con innovacións coma samplers, ritmos africanos e incluso atrevéndose co hiphop. Todo un luxo nun formato reducido onde Stefano e Marcos móstranse virtuosos e cautivarán ao público dende o comezo do concerto nun espectáculo moi intimista e no que o público remata sendo parte do propio show.