VILAGARCIA DE AROUSA

CONCELLO
O asesoramento da OMIC de Vilagarcía permite que o 30% dos conflitos se solucionen en primeira instancia
O 30% dos conflitos que os cidadáns fixeron chegar o ano pasado á Oficina Municipal do Consumidor de Vilagarcía (OMIC) resolvéronse en primeira instancia, e de forma satisfactoria para os usuarios, sen necesidade da formalización de reclamación ante o Servizo Provincial de Consumo. Grazas á información e asesoramento proporcionado polo persoal da oficina municipal, os afectados conseguiron solucionar o conflito directamente coa empresa, mediante reclamación interna a través dos servizos de atención ao cliente, ou cubrindo a folla de reclamacións.

01.04.2023.- A resolución de conflitos en primeira instancia evita que as reclamacións cheguen ao organismo oficial e contribúe a que o acordo entre as partes se adopte de forma máis rápida para os consumidores. Malia todo, se esta vía directa non é posible, a OMIC axuda aos usuarios a tramitar a correspondente queixa ante a administración competente en materia de consumo, garantindo a protección dos dereitos dos usuarios.

Esta é unha das principais conclusións extraídas da memoria anual que vén de publicar a OMIC de Vilagarcía, documento no que se recolle que o servizo municipal atendeu en 2023 un total de 1.701 consultas e reclamacións, das que 1.355 corresponderon ao sector servizos, e as 346 restantes, ao de produtos.

Como vén sendo habitual xa dende hai anos, o maior número de atencións realizadas sobre servizos foron en relación aos sectores de electricidade (221) e telefonía móbil (166). En terceiro lugar situáronse a banca e os servizos financeiros (124 atencións). Malia que a competencia nestes últimos sectores non as ten o Servizo de Consumo, senón o Banco de España e a Comisión Nacional do Mercado de Valores, dende a OMIC se informa ao consumidor do organismo ao que se deben dirixir e se lles informa sobre o procedemento a seguir para realizar correctamente a reclamación. O mesmo acontece en materia de seguros (107 atencións), onde o organismo competente é a Dirección Xeral de Seguros e Fondos de Pensións.

A lista dos sectores que máis consultas e reclamacións xeraron no campo da prestación de servizos complétase con internet (92), comercio electrónico (74), transporte aéreo (64), servizos profesionais (48), axencias de viaxe (41) e gas (40).

No apartado de compra de produtos, encabezan o ranking os teléfonos móbiles (73) –sendo unha das causas máis repetidas as reclamacións por incumprimento de garantías-electrodomésticos (41), coches (36), roupa (33) e calzado e complementos (26).

Unha oficina de referencia na contorna

A OMIC do Concello de Vilagarcía é un servizo de referencia na comarca e na súa contorna, como o demostra que, aínda sendo unha oficina municipal, atenda anualmente a moitos consumidores de concellos veciños. O ano pasado acudiron ás dependencias municipais para informarse ou presentar reclamacións veciños de Vilanova, A Illa, Cambados, Caldas de Reis, Catoira, Valga, Meis, Portas e Ribadumia.

Xornadas informativas sobre temas de actualidade

A maiores da atención de consultas, a OMIC de Vilagarcía tamén organiza actividades informativas sobre temas de actualidade ou de especial interese para os consumidores. En 2023 celebrouse unha xornada sobre a factura da luz e outra sobre os dereitos básicos das persoas consumidoras de servizos financeiros. En ámbolos dous casos contouse coa colaboración de técnicos do Instituto Galego de Consumo para impartir das sesións.

A OMIC de Vilagarcía atende ao público de forma presencial (os luns, mércores e venres en horario de 8.30 a 14.00 horas) e telefónica (de luns a venres, co mesmo horario). O servizo ten as súas dependencias no entresollado do Concello e o número de teléfono é o 986 099 200 extensión 222.