|
Xusto un ano despois de que a Rede de Cidades que Camiñan outorgara un dos seus premios a Vilagarcía de Arousa polas melloras obtidas nos últimos anos en materia de mobilidade peonil, outra rede, neste caso a de Cidades Saudables, vén de recoñecer a aposta local polos camiños escolares seguros na categoría de "Fomento dun Desenvolvemento Urbano Saudable e Sostible". Na rede, promovida pola Federación Española de Municipios e Provincias (FEMP), participan 507 entidades locais de todo o estado español, que suman 27,5 millóns de persoas. Neses mesmos premios e noutras categorías, foron igualmente recoñecidos concellos como os de Bilbao, Jerez de la Frontera, Miajadas (Cáceres) ou Utebo (Zaragoza). |
