AVISOS
O desfile de Entroido aprázase ao sábado de Piñata ante a alta probabilidade de choiva A celebración do desfile concurso de disfraces de Vilagarcía trasládase ao vindeiro sábado, 17 de febreiro, debido a alta probabilidade de choiva existente para a tarde de mañá, Martes de Entroido. O programa e o percorrido do multitudinario evento manterase igual e o prazo de inscrición para os concursantes amplíase ata o venres a mediodía.
12.02.2018.- A previsión meteorolóxica para a tarde de mañá, martes de Entroido, apunta altas probabilidades de choiva. Ante este panorama, e para non estragar o desfile de carrozas e disfraces que tradicionalmente se celebra o martes de Entroido, a Concellería de Cultura decidiu suspender o acto de mañá e trasladado ao sábado de Piñata.
Co único cambio de día, o resto do programa mantense como estaba previsto. O desfile comezará ás cinco da tarde e realizará o novo percorrido a estrear este ano: partirá dende a Rúa Alexandre Bóveda (zona da Praza de Abastos) e dirixirase por Alejandro Cerecedo cara Doutor Tourón, Praza de España, Edelmiro Trillo, Padre Feijoo e Praza da Independencia. Aquí desviarase por Gumersindo Nartallo e enlazará con Juan Carlos I para continuar pola Praza da Constitución, xirar na Rúa Colón e incorporarse á Avenida da Mariña para continuar por Conde Vallellano e Arcebispo Lago , rematando de novo na Rúa Alexandre Bóveda.
O desfile rematará na Praza da Peixería cun baile amenizado pola Duendeneta. Aproximadamente, ás 20:30 horas farase público o fallo do xurado para conceder os premios aos mellores disfraces nas diferentes categorías.
A Concellería de Cultura manterá a inscrición aberta ata o venres a mediodía. Dende o departamento pregan ás persoas e colectivos xa inscritos que si debido ao cambio de data, non vaian a acudir ao desfile de Vilagarcía, que tamén o comuniquen, a efectos dunha mellor organización do evento.