POLICÍA LOCAL
Tres novos axentes se suman ao plantel da Policía Local, á espera de incorporar outros tres durante este ano Despois dun longo proceso de selección, que incluíu unha oposición e os curso de formación na Academia Galega de Seguridade, o plantel da Policía Local xa conta con tres novos axentes, á espera de que durante este exercicio se incorporen outros tres. Na actualidade son 38 os axentes.
02.02.2018. No acto de toma de posesión, o alcalde, Alberto Varela, subliñou o seu compromiso de dotar de máis medios humanos e materiais á Policía Local, algo que reclaman non só o colectivo laboral senón a propia cidadanía. Despois de anos nos que se non se puido repoñer efectivos, o concello comeza a renovar o plantel, cubrindo así xubilacións e baixas laborais.
O alcalde xustificou a lentitude do proceso administrativo para incrementar o número de axentes, pero asegurou que o proceso está en marcha e a toma de posesión dos tres novos traballadores é un exemplo. Nestes momentos está aberto, ademais, o proceso para a contratación doutros tres, que confía en que sexa unha realidade neste 2018, despois da adhesión do concello ao convenio coa Xunta de Galicia para que sexa esta quen coordine a selección de axentes locais en toda a comunidade, axilizando así as oposicións e os cursos conseguintes na Academia Galega de Seguridade.
Por outra parte, o alcalde anunciou que nos vindeiros meses porase en marcha o servizo de policía en bicicleta. Os vehículos xa están adquiridos e hai voluntarios dentro do plantel para comezar a patrullar en bici. A escasez de persoal, sen embargo, non fai doado poñer a funcionar o servizo con carácter inmediato, de xeito que probablemente haberá que esperar á chegada dos axentes auxiliares de cara ao verán.