CONCELLO
Catro das cinco praias de Vilagarcía acadan o nivel de “excelente” na calidade das súas augas As augas de catro das cinco praias do Concello acadan o nivel máximo de calidade para o baño, segundo o último informe anual realizado pola Dirección Xeral de Saúde Pública da Consellería de Sanidade da Xunta de Galicia. Os areais cuxas augas son cualificadas como “excelentes” para o baño son as da Compostela, Campanario (Bamio), Preguntoiro (Vilaxoán) e Canelas (Sobradelo). A praia da Concha aproba cun “suficiente” igual que o ano anterior.
08.12.2017.- O informe anual remitido pola Xunta baséase nas analíticas realizadas ao longo de todo o ano 2017 e é o que estará vixente de cara a tempada 2018. Segundo estes datos, a evolución rexistrada pola calidade das augas das zonas de baño do municipio foi positiva, posto que ademais de manter o nivel de excelente en tres areais que xa o tiñan en 2016 (Compostela, O Campanario e Preguntoiro), mellora tamén a cualificación de Canelas, que pasa de “boa” a “excelente”. O obxectivo pois, de cara ao próximo ano será manter o máximo de excelencia nestes catro areais e tratar de seguir mellorando o da Concha.
O informe da Consellería de Sanidade realízase no marco do Programa de vixilancia sanitaria das zonas de baño marítimas e continentais que ven executando a través da Dirección Xeral de Saúde Pública dende mediados da década dos oitenta. O control sanitario levouse a cabo mediante a mostraxe periódica da auga das zonas de baño, realizada polo corpo de farmacéuticos inspectores da saúde pública de cada xefatura territorial de Sanidade segundo o calendario preestablecido. A clasificación sanitaria calcúlase seguindo o mesmo procedemento que a Unión Europea.