OBRAS E SERVIZOS
O Concello ensanchará as beirarrúas no tramo de Doutor Tourón entre o río e a Glorieta da Mariña Española O Concello de Vilagarcía segue adiante co plan de mellora da accesibilidade e a mobilidade nas rúas e espazos públicos municipais. A Área de Mobilidade e a Concellería de Obras veñen de planificar unha nova actuación que afectará ao tramo da avenida Doutor Tourón comprendido entre a ponte do Con e a Glorieta da Mariña Española. O proxecto prevé o ensanche das beirarrúas a ambos lados da vía, a eliminación de barreiras arquitectónicas e a mellora da iluminación nos pasos de peóns. A obra está valorada en 47.562 euros e financiarase integramente con fondos propios do orzamento en curso.
25.11.2017.- A memoria de actuación elaborada polo Enxeñeiro Técnico do Concello foi aprobada na última Xunta Local de Goberno. A actuación nesta zona é unha necesidade que se pon de manifesto a diario ao tratarse dunha vía altamente frecuentada por peóns, especialmente ás horas de entrada e saída dos colexios e da Escola Infantil da Lomba. As beirarrúas neste tramo son moi estreitas e vense restrinxidas aínda máis polas baixantes das ramplas dos pasos de peóns, situación dificulta o tránsito a pé e aínda máis o paso con carros de bebé ou cadeiras de rodas que teñen que inclinarse para pasar por eses puntos.
Para salvar esta complicación e garantir a perfecta accesibilidade as beirarrúas gañarán 1,10 metros de ancho a ambos lados da vía. A medida será posible eliminando o carril intermedio habilitado nesta zona entre os dous sentidos da circulación. Deste xeito, cumprirase a normativa de accesibilidade que marca en 1.80 metros o ancho mínimo das beirarrúas. O pavimento a utilizar para as beirarrúas será unha mestura de formigón con cemento branco que proporciona a uniformidade necesaria para facilitar o tránsito cómodo de persoas, carros ou cadeiras de rodas. Ademais, con efectos estéticos e tamén para proporcionar maior adherencia, o formigón tratarase e daráselle un acabado rallado mediante o uso dun cepillo metálico. Os pasos de peóns nos cruces existentes na zona de actuación elevaranse ata quedar a nivel das beirarrúas para garantir a accesibilidade e dotaranse da correspondente iluminación para mellorar a seguridade viaria.
Aproveitando as obras, instalaranse novos sumideiros para a recollida de augas pluviais e elevaranse as tapas das arquetas e pozos de rexistro á nova rasante. Por último, renovarase toda a sinalización horizontal e vertical do vial.
Este novo proxecto de accesibilidade realizarase coa maior brevidade posible dado que xa existe dotación orzamentaria. O prazo de execución das obras é de 1 mes.