VILAGARCIA DE AROUSA

CONCELLO
O Concello elevará a altura do portalón de acceso ao Anexo A Lomba para dificultar a entrada de vándalos
O concelleiro de Educación, Argimiro Serén, recibiu este mediodía a unha representación da Asociación de Nais e Pais do Anexo A Lomba que solicitaran o encontro para abordar o problema que supón a repetida entrada de vándalos ao recinto escolar. Para evitar ou, cando menos, dificultar esta práctica, o concelleiro comprometeuse a elevar a altura do portalón de acceso ao centro, lugar por onde se supón que os vándalos trepan para introducirse no recinto polas noites.

25.09.2017.- Pese a non tratarse dunha actuación de conservación ou mantemento propiamente dita, que son ás que lle competen á administración local, o concelleiro aseguroulles que a asumirá o Concello. Nos vindeiros días, persoal do departamento de obras acudirá ao centro para determinar a solución máis factible.

En canto á rotura de algúns xogos infantís como consecuencia dos actos vandálicos, o edil informounos de que o trámite máis axeitado nestes casos é presentar unha incidencia ante a Xefatura de Educación achegando denuncia policial dos danos para tramitar a súa reposición a través do seguro. Non obstante, para tratar de paliar a perda entre tanto, o edil mandará trasladar ao Anexo a caseta de xogos que existía na antiga escola unitaria do Pedroso, agora pechada.

Por último, o concelleiro tamén se comprometeu a repoñer os arcos en forma de U invertida que faltan ao longo do paso pintado a modo de beirarrúa pola subida de Marxión e que impiden que os vehículos o invadan.

Os membros da ANPA expuxéronlle a Serén outras necesidades do centro, como por exemplo a mellora dos falsos teitos. Dado que esa actuación competeríalle á Consellería de Educación da Xunta, o concelleiro socialista explicoulles que o procedemento lóxico a seguir é que a dirección do centro curse a petición á Xefatura Provincial de Educación e que tamén se trate no Consello Escolar. Serán asegurou que o Concello tamén apoiará expresamente a petición.