INFRAESTRUTURAS
Varela demanda da Consellería de infraestruturas que dea pasos para acadar a intermodalidade O alcalde de Vilagarcía, Alberto Varela, acudirá o martes a un encontro coa conselleira de Infestruturas, Ethel Vázquez, cos dous temas principais na axenda: Demandar que se comecen a dar pasos para acadar a necesaria intermodalidade do trasporte en autobús e ferrocarril en Vilagarcía e solicitar a colaboración do departamento autonómico na financiamento do VaiBus Plus,! o servizo de autobuses ao Hospital do Salnés que subvenciona o Concello. A cita será en Pontevedra e tamén asistirá a concelleira de Mobilidade, Paola María.
25.09.2017.- Foi en febreiro de 2016, cando Varela, se entrevistou por vez primeira con Ethel Vázquez, para expoñerlle a necesidade e a facilidade que ten Vilagarcía de establecer unha eficiente intermodalidade entre o transporte público en autobús e ferrocarril. Naquel momento, a conselleira explicou que os investimentos autonómicos para este tipo de actuacións comezaran polas grandes cidades polo que, a continuación, teríase en conta Vilagarcía. Transcorrido ano e medio, o rexedor socialista volverá a reunirse coa conselleira para insistir na petición e demandar da consellería que se vaia redactando o proxecto das obras a realizar na estación de autobuses –de titularidade autonómica- para establecer a intermodalidade coa de ferrocarril, situada case ao lado.
Cómpre lembrar que unha das alegación ao Presupostos da Xunta presentadas polo grupo parlamentario socialista solicitaban que se recollese unha partida para a redacción do proxecto da intermodalidade para Vilagarcía.
As xestións realizadas polo alcalde de Vilagarcía para acadar a necesaria intermodalidade non se limitaron á administración autonómica. En maio de 2016, o rexedor tamén se reuniu coa entón ministra de Fomento, Ana Pastor, para solicitar a inclusión da estación de tren de Vilagarcía nas accións a levar a cabo cos 35 millóns de euros que a UIE concedera ao Estado para promover a intermodalidade.
Froito dese encontro acordouse que estas accións deberían levarse a cabo a través da colaboración e coordinación entre a Consellería e o Ministerio. O grupo de goberno de Vilagarcía considera vital para o desenvolvemento da cidade a intermodalidade entre o transporte colectivo por estrada co ferroviario. Ademais, apuntan as óptimas características que se dan en Vilagarcía: dispón de estacións contiguas de tren e autobús, conta cunha das estacións ferroviarias máis importantes do noroeste peninsular no que a número de pasaxeiros se refire, e a cidade sitúase nunha posición xeo estratéxica. A conexión entre ambos medios de locomoción e a coordinación de servizos para atender e dar servizo aos 100.000 habitantes da comarca é esencial tanto para Vilagarcía como para o resto do Salnés.
Ampliar o VaiBus Plus! a horario de tarde
Por outro lado, o alcalde e a concelleira de Mobilidade aproveitarán o encontro para solicitar a colaboración económica da Consellería no VaiBus Plus!, o servizo de autobús ao Hospital do Salnés posto en marcha hai uns meses por iniciativa do Concello co obxecto de paliar unha carencia e atender unha demanda que os veciños viñan realizando dende hai anos. O desexo do Concello, que subvenciona o servizo, é que a Consellería axude no financiamento para permitir ampliar os servizos en horario de tarde, xa actualmente os autobuses funcionan entre as sete da mañá e as dúas da tarde.