CONCELLO
O Concello volve a ampliar o plantel da Policía Local coa creación de 3 novas prazas de axente en 2017 A Policía Local de Vilagarcía volverá a reforzarse este ano coa incorporación de 3 novos axentes. A X unta de Goberno Local aprobou na reunión desta mañá a oferta de Emprego público para 2017 na que se recolle o compromiso adiantado o ano pasado polo executivo socialista de crear 3 novas prazas de garda municipal co obxecto de que o corpo vaia cubrindo o déficit de persoal que arrastra dende hai anos.
24.07.2017.- Estas novas prazas de axente súmanse ás 3 que xa se cubriron mediante as oposición celebradas a principios deste ano e cuxos titulares están a piques de rematar a súa formación na Academia Galega de Seguridade.
A aposta do goberno quen preside Alberto Varela por dotar á Policía Local dun plantel dimensionado á realidade e ás necesidades de Vilagarcía volve a poñerse de manifesto con esta nova medida que pretende mellorar as condicións de traballo dos axentes, que ao ser máis poderán distribuír de xeito máis racional a carga de traballo, e tamén prestar mellor servizo á cidadanía do municipio que cada vez máis, reclama maior presenza de axentes nas rúas. A maiores da creación de novas prazas, o goberno tamén pretende que a RPT prevea mecanismos de promoción interna.