VILAGARCIA DE AROUSA

FESTAS
A tradición das cachadas segue a medrar e Vilagarcía con máis de 300 solicitudes para San Xoán e San Pedro
A tradición do lume purificador para recibir o solsticio de verán segue a medrar en Vilagarcía en base exponencial. Este ano presentáronse máis de 300 solicitudes para realizar cachadas nas noites de San Xoán e San Pedro, un cento máis que en 2016. Ademais, hai que ter en conta que o número de fogueiras a realizar nestas dúas noites é moito maior, posto que a maioría de solicitudes de particulares pide permiso para facer cachadas nas dúas datas. O listado cos permisos concedidos publícase mañá na web municipal e lémbrase que todas as cachadas autorizadas deben cumprir as medidas de seguridade e limpeza que se recollen no bando específico para estas celebracións.

22.06.2017.- O maior número de solicitudes corresponden a particulares para a realización de fogueiras en fincas privadas. Son un total de 258 e repártense por todas as parroquias do municipio. Sepáranse destas as fogueiras a desenvolver nas zonas das praias, que son un total de 39, das cales a excepción de unha, todas son para a noite de San Xoán. Como ven sendo habitual, tamén os colectivos e asociación e os locais de hostalería solicitan permiso para celebrar esta tradicional festa con fogueiras e barbacoas para facer sardiñadas na vía pública. Para isto solicitáronse 30 permisos, 20 de locais e 10 de colectivos.

Seguridade e limpeza
O bando informa dos requisitos de obrigado cumprimento por parte dos organizadores das fogueiras, obrigas coas que se pretende garantir a seguridade nas celebracións. A fogueira terá un perímetro de seguridade de 6 metros de radio por cada metro de altura, porase especial coidado de non situalas baixo tendidos eléctricos ou telefónicos, e de que estea lonxe de zonas arboradas, así como de que nos arredores non exista ningún local lo que se almacenen produtos inflamables. Non se poderán acumular combustibles nos arredores das cachadas e tampouco se poderán queimar nelas material contaminantes ou perigosos, como neumáticos, aerosois, etc...

Para garantir a seguridade e atallar posibles incidencias, deberá disporse de material para a extinción do lume, tal como caldeiros con auga, area ou extintores, e os organizadores están obrigados a deixar completamente apagada a fogueira antes de marcharse, para o cal deberán empapala en auga. Ademais, con exceso de vento non se poderá prender a fogueira.

A maiores destas normas de seguridade, as fogueiras autorizadas nas praias deberán cumprir tamén o requisito de instalarse respectando os 6 metros de servidume de paso dende a liña de preamar ou marea alta, tal como se recolle na ordenanza reguladora do uso das praias.

No caso de que se teña intención de realizar a cachada na beirarrúa ou en calquera outro espazo público, ademais de cumprir os requisitos xa mencionados, deberá solicitarse un permiso de ocupación da vía ou espazo público, protexendo o pavimento con placas de ferro, area ou material similar que evite danalo e debendo deixar a zona limpa unha vez rematada a fogueira.

Vixilancia e control

A lista das fogueiras autorizadas polo Concello publicarase na web municipal. Aquelas cachadas que non fosen autorizadas, ou para as que non se presentase solicitude previa, non poderán levarse a cabo, quedando encargados os servizos municipais de impedir o seu desenvolvemento. Efectivos do Servizo Municipal de Emerxencias e da Policía inspeccionarán as fogueiras que obteñan permiso a efectos de verificar o cumprimento das normas de seguridade.