CONCELLO
As festas de Santa Rita arrancan coa Feira Celta e o concerto de Pacho Flores & Jesús “Pingüino” González As festas de Santa Rita arrancan mañá venres pola tarde con actividades para todos os gustos e para todas as idades. A maiores dos actos relixiosos e a romaría na zona monumental de Vista Alegre, a xornada contará con apertura e as numerosas actividades previstas na Feira Celta no Parque da Xunqueira, un concerto internacional no Auditorio a cargo dos músicos venezolanos, Pacho Flores e Jesús “Pingüino” González” e a tradicional verbena a cargo da Orquestra Ache.
18.05.2017.- A Feira Celta contará este ano coa 65 postos. Abrirá as súas portas ás cinco da tarde, momento no cal comezarán a desenvolverse os obradoiros e demostracións de oficios antigos. Ás seis e media está prevista un espectáculo de maxia e malabares e unha hora despois o tallista da feira amosará ao público como se traballaba antigamente a madeira. Media hora despois un obradoiro onde os máis activos poderán aprender o uso manexo da pedra celta denominada “quiastolita”. A continuación haberá unha demostración de cestería e ás nove e media un espectáculo de fachos de lume e a representación dunha voda celta. O fío musical durante toda a tarde e pola noitiña correrá a cargo do grupo Os Gascones.
O grupo de gaitas da asociación cultural Nosa Señora da Xunqueira será o encargado de realizar o pasarrúas para anunciar polas rúas da cidade que xa comezaron as festas de Santa Rita.
Prestixiosos músicos de recoñecemento internacional
A música internacional chega ás 21:00 horas ao Auditorio da man dos prestixiosos músicos venezolanos Pacho Flores & Jesús “Pingüino” González que ofrecerán un concerto de trompeta e guitarra organizado a través da Sociedade Filarmónica de Vilagarcía en colaboración coa Concellería de Cultura. Os socios da Filarmónica poderán asistir de balde a este interesante concerto e o demais público deberán pagar unha entrada de 6 euros. Trátase dunha oportunidade única de poder gozar da música destes dous virtuosos da música de raíz popular.
A primeira xornada festiva de santa Rira rematará pola noite coa verbena que ofrecerá a Orquestra Ache na Rúa Alexandre Bóveda (fronte a Praza de Abastos).