MEDIO AMBIENTE
O Concello impulsa en outubro unha nova fase do plan de compostaxe unifamiliar en zonas rurais A Concellería de Medio Ambiente ten previsto dar un novo pulo ao sistema de compostaxe para a xestión e redución dos residuos sólidos urbanos de carácter orgánico. A idea, ademais da posta en marcha da experiencia piloto da compostaxe comunitaria no barrio urbano do Piñeiriño, é seguir estendendo este método nas zonas do rural, para o cal en outubro repartiranse 70 composteiros individuais para vivendas unifamiliares.
26.09.2016.- Para esta nova fase de compostaxe unifamiliar o Concello conta coa colaboración do Sogama, que é quen aporta os colectores que o Concello recibirá nun prazo máximo de quince días. Para realizar o reparto, o departamento municipal de Medio Ambiente xa comezou a contactar coas persoas que estaban en lista de agarda da anterior fase desenvolvida anteriormente. De todos xeitos, a inscrición segue aberta e os interesados poden anotarse presentando solicitude no rexistro do Concello ou enviando un correo electrónico ao enderezo bmalvar@vilagarcia.es
A intención do concelleiro Lino Mouriño é realizar outra fase de ampliación do plan de compostaxe no rural a principios do vindeiro ano, polo qyue as persoas que non accedan a estes 70 composteiros quedarán en lista de agrada para o seguinte reparto. Os depósitos que se entregarán en outubro están elaborados en mateiral 100% reciclado e teñen unha capacidade de 341 litros. As súas dimensións son 76 x76 centímetros de base e 85 cm de alto.
Información e seguimento
Co obxectivo de que as persoas que se sumen a esta iniciativa reciban toda a información para poñerse a elaborar compost cos restos orgánicos que se xeran nas súas casas, xusto antes do inicio do reparto dos composteiros, serán convocadas a unha sesión informativa. Ademais, para que poidan resolver as dúbidas que lles vaian xurdindo durante o proceso, disporán de apoio e seguimento por parte dun técnico do Concello.
De forma paralela, tam´çen está previsto que a empresa contratada pola Deputación instale nas vindeiras semanas o composteiro comunitario no Piñeiriño, barrio de Vilagarcía onde se porá en marcha a experiencia piloto da compostaxe en zonas urbanas que está a promover o organismo provincial en colaboración cos concellos máis urbanos.
O goberno local aposta pola implantación da compostaxe como un método ecolóxico que permite reducir a cantidade de residuos sólidos urbanos da tradicional bolsa de lixo. Con elo redúcense os custes de transporte e incineración que se pagan a Sogama e obtense o abono orgánico denominado compost que as propias familias pode utilizar para os seus cultivos, plantas ou xardíns.
A compostaxe implantouse por vez primeira en Vilagarcía durante o goberno de Dolores García cunha experiencia piloto nas zonas dio rural. Agora, o executivo de Alberto Varela pretende darlle forza mediante estas novas fases no ámbito rural e tamén no urbano.