OBRAS E SERVIZOS
A campaña de primavera abarca estes días lavado de beirarrúas, limpeza de cunetas e posta a punto de praias A campaña de primavera posta en marcha xa hai semanas pola Concellería de Obras e servizos que dirixe Lino Mouriño emprégase estes días en diversos frontes para tratar de mellorar a imaxe de Vilagarcía nas diferentes partes do municipio. Os traballos, nos que participan operarios i de Obras, Medio Ambiente e tamén da empresa concesionaria de Limpeza, céntranse estes días en lavado de beirarrúas, corta de maleza en arcéns e camiños e en tarefas de posta a punto dos servizos de praias.
28.05.2016.- Despois de repasar a zona de Vista Alegre e parte das zonas peonís do centro, a máquina de lavado de beirarrúas estivo esta semana que remata nas rúas do barrio da Xunqueira. O plan de traballo sinala que a partir do luns continuará pola Avenida de Matosinhos e Doutor Tourón, para ir achegándose a mazá que delimitan as rúas Fariña Ferreño, Arcebispo Xelmírez, Santa Eulalia e Celso Emilio Ferreiro para seguir posteriormente por Rodrigo de Mendoza.
As tarefas de corta de maleza en cunetas e camiños, especialmente das zonas do rural, chegan o luns a Bamio onde os operarios de Medio Ambiente traballarán facendo uso da varredora da Mancomunidade do Salnés da que disporán durante quince días. Neste tempo está previsto tamén que se despracen ata a zona do Pousadoiro-Cea para despexar os camiños das herbas que medran especialmente durante estas semanas de primavera. Tamén traballará na limpeza de camiños a brigada de Cespa.
Dada a proximidade dos meses de verán, o departamento que dirixe Mouriño traballa tamén nos preparativos para a temporada de praias. Xa están en marcha os traballos de mantemento e posta a punto dos servizos dos areais. De feito, a Xunta Local de Goberno aprobou a semana pasada o gasto da compra de materiais para acometer os arranxos necesarios, basicamente listóns de madeira para repoñer os que se atopen en mal estado das pasarelas de acceso aos arenais.
Dentro deste mesmo bloque, o persoal de Medio Ambiente rematará nos vindeiros días os traballos de acondicionamento do xardín do Preguntoiro onde xa levan uns días limpando , reparando e pintando o mobiliario.