DEPORTE
A Fundación recupera a Escola Infantil de Remo na oferta de actividades deportivas de verán A oferta de actividades deportivas infantís organizadas para os meses de verán pola Fundación Municipal componse da escola de remo, as actividades multideportivas a desenvolver na praia e ás clases de patinaxe en liña. As actividades impartiranse os meses de xullo e agosto, pudendo optar os interesados a un mes, ao á temporada completa de verán. A cota é de 12 euros por un mes e 18 polos dous, prevéndose as correspondentes bonificacións. O prazo de inscrición para calquera das tres modalidades vai do 6 ao 27 de xuño e o trámite debe realizarse nas dependencias da Fundación (Fexdega) en horario de 9 a 14 horas.
27.05.2016.- Na Escola Multideportiva de Verán, na que engloban as actividades de multideporte e patinaxe poderán participar nenos e nenas nados entre os anos 2000 e 2009. As actividades multideportivas celebraranse nas praias da Concha Compostela dous días á semana en horario de mañá e con sesións de hora e media de duración cada día. As clases de patinaxe serán un día á semana, tamén cunha duración de hora e media, e celebraranse no recinto de Fexdega en horario de mañá.
A Fundación de Deportes organiza a Escola de Remo coa colaboración do Club de Remo Vilaxoán, cuxos monitores serán os encargados de impartir a actividade destinada a nenos e nenas nados entre os anos 200 e 2006 co requisito de que saiban nadar. Ofértanse 30 prazas. A actividade desenvolverase na Praia de Vilaxoán.
A cota xeral por asistir ás actividades deportivas de verán é de 12 euros por un mes e 18 polos dous. Non obstante, será de balde para os posuidores do carné da Fundación e establécense bonificacións a familias numerosas e en base ao nivel de ingresos da unidade familiar chegando a ser de balde.