XUVENTUDE
A mocidade decidirá a temática dos cursos de cultura urbana, arte e cociña a organizar en Vilagarcía Os mozos e mozas de Vilagarcía poderán elixir a temática dos obradoiros e alternativas de lecer que desecan que se impartan na cidade dentro do programa Depo Ruárte que organiza a Deputación Provincial. O organismo provincial concederá ao Concello as actividades que demande a mocidade, polo que a Concellería de Xuventude anima á xuventude a cubrir o formulario on line indicando as súas preferencias entre a innovadora e variada oferta existente e que se vertebra en torno á cultura urbana.
30.04.2016.- O programa RúArte conta con cinco bloques temáticos relacionados coa música, o deporte, o arte urbano, as novas expresións artísticas ou a cociña-
No bloque denominado MusicARTE, os mozos e mozas de Vilagarcía poderán demandar por exemplo obradoiros de Break Dance, Rap, Funky, Hip-Hop ou sobre O teu corpo: un instrumento. No módulo RúARTE ofértanse cursos de Slackline, Monopatín e o obradoiro “Sobre rodas”. No apartado UrbanARTE, poden optar a actividades de Graffiti, Xogos malabares e monólogos na rúa; mentres que en CreArte terán a oportunidade de aprender a crear historietas, fanzines ou curtametraxes co móbil.
Por último, e dado o interese que a cociña ten tamén entre a mocidade ofértanse os cursos de cociña tradicional, vegana e vexetariana, internacional e de sobremesas a través das actividades denominadas A Cociña da Avoa, Cociña en verde, O mundo do Prato, Adózate e Coitelería e Batidos sen alcohol.
Dado que as actividades e a temática das mesmas concederanse en función á demanda dos usuarios, a Concellería de Xuventude que dirixe Sonia Outón anima á xuventude de Vilagarcía a manifestar as súas preferencias cubrindo o formulario dispoñible no enderezo http://www.depo.es/depo-ruarte/participa