VILAGARCIA DE AROUSA

DEPORTE
Adxudicado o acondicionamento dos terreos do contorno do campo de fútbol de Bamio
A Xunta Local de Goberno aprobou hoxe o último dos trámites que faltaban para poder iniciar a obra de mellora do campo de fútbol de Bamio. Despois de que a semana pasada se aprobara a compra dos terreos qub faltaban a tres propietarios, na reunión celebrada esta mañá o goberno adxudicou á empresa Marco os traballos de ampliación da explanada e adecuación do contorno do campo a efectos permitir a realización do proxecto que prevé a ampliación das instalacións deportivas e a dotación de herba artificial no terreo de xogo.

31.08.2015.- As obras iniciaranse tan pronto como a empresa presente a documentación e asine o contrato. Marco tamén é a adxudicataria da primeira fase do proxecto, á relativa ás instalacións deportivas propiamente ditas, polo que os traballos realizaranse de forma continua e sen pausa unha vez comecen as obras. A primeira fase das obras financiarase cunha subvención da Deputación Provincial que ascendía a 475.000 euros. A segunda, incluída a compra dos terreos, finánciase con fondos municipais.

Con este trámite ponse punto e final a un longo e tortuoso proceso que fixo que a mellora do campo de fútbol de Bamio acumule un ano de atraso. En apenas dous meses, o goberno que preside Alberto Varela conseguiu desbloquear a situación que se encontraba atascada debido a que o proxecto redactado superaba as medidas reais do campo. O executivo socialista xestionou a adquisición dos terreos que faltaban negociando con propietarios da zona, modificou o proxecto para adaptalo ás novas condicións amplialo con novos servizos, buscou a financiamento para a compra e para acometer o acondicionamento dos mesmos e contrato os traballos.

Con este proxecto reformado, o campo poderá ampliarse de xeito que o terreo de xogo conte coas dimensións regulamentarias para a práctica de varias disciplinas deportivas, como por exemplo o rugby. Ademais, ampliación permitirá construír aseos, un servizo do que o proxecto inicial prescindía. Entre outros aspectos, as obras de mellora no campo de fútbol de Bamio consisten basicamente en dotar ao actual campo de céspede artificial, mellorar a iluminación do recinto e dotalo de sistema de rega e drenaxe e distintos elementos para a práctica deportiva como porterías para fútbol 11 e fútbol 7 e bancadas para os equipos.