AVISOS
O Concello desaconsella o baño na Concha-Compostela por un vertido de augas residuais O Concello decidiu izar hoxe a bandeira amarela e colocar carteis de advertencia desaconsellando o baño na praia da Concha-Compostela logo de recibir un fax, preto das dúas e media da tarde, da Consellería de Sanidade no que se advirte que a última análise das augas detectou a presenza de Escherichia Colli en niveis superiores aos 1.500 NMP/100 ml permitidos segundo a normativa. Ao parecer, o vertido de augas residuais se produciu nun tramo do areal preto do Centro de Interpretación da Ría de Arousa (CIRA).
29.07.2015.- Con independencia de que hoxe mesmo se vai realizar unha contraanálise, de acordo coa normativa –Real Decreto de xestión de calidade das augas e Directiva Europea sobre o mesmo asunto- o concello ordenou pouco despois o izado da bandeira amarela, ao tempo que puxo carteis recomendando "non bañarse temporalmente por contaminación microbiolóxica na auga".
Lamentando o suceso, isto non fai máis que ratificar a petición do goberno local de que, coa intervención directa da Xunta, se afronte dunha vez o comprometido saneamento integral da ría e especificamente do litoral vilagarciá. Como se sabe, a primeira entrevista que solicitou o alcalde, Alberto Varela, con un membro do goberno da Xunta foi, precisamente, coa conselleira de Medio Ambiente e para retomar ese proxecto, anunciado hai case dous anos polo entonces titular do departamento, Agustín Hernández, nunha visita a Vilagarcía.