VILAGARCIA DE AROUSA

CULTURA
A Coral de Sobradelo conmemora o seu 30 aniversario coa Máximo Patiño e o Coro Clásico de Vigo
A Coral de Sobradelo abre mañá os actos conmemorativos do seu 30 aniversario cun concerto que terá lugar no Salón García a partir das 21:00 horas. A formación estará acompañada nesta ocasión tan especial pola Coral Máximo Patiño de Vilaxoán e o Coro Clásico de Vigo. A entrada é de balde.

03.07.2015.- A Coral de Sobradelo preparou dous concertos extraordinarios para celebrar con todos os vilagarciáns os seus primeiros 30 anos de vida. A formación naceu en 1985, sendo o seu promotor o párroco de Sobradelo, Daniel Espiño. El foi quen convenceu a algunhas persoas da parroquia a formar unha coral, contando xa dende os inicios coa colaboración de Xesús Portas, que asumiu a dirección, e de Ramón Latas, como co director.

A traxectoria da coral foi ascendente dende o primeiro momento, dándose a coñecer por toda Vilagarcía e tamén en todos os concellos da provincia. Forma parte da Federación Coral Galega dende 1986 e, do seu currículo e palmarés citar, o terceiro premio no “ I Concurso Pelegrín de Panxoliñas e cantos de Nadal”, ou as súas intervencións no programa “ Galicia Cantat” organizado polo IGAEM (hoxe Agadic).

O concerto de mañá abrirao a Coral Máximo Patiño de Vilaxoán que, coa dirección de Modesta Padín, interpretará un programa de música popular composto por temas como Siboney, Gaviotas, Os Meus Amores Rula e Zorongo. Pola súa banda, o Coro clásico de Vigo preparou para o aniversario dos de Sobradelo os temas Cohors Generosa, Boga Boga, Rosina, Aureana do Sil e Colorín.

A coral homenaxeada será a última en actuar en solitario. Baixo a dirección de Ramón Latas e Xesús Portas, os de Sobradelo deleitarán ao público con outros cinco temas de corte tradicional e popular: A Ti, Blanco Velero, Moon River, Que pase ao redor de min? E Unha noite na eira do trigo.

Como colofón ao espectáculo, as tres formacións interpretarán conxuntamente o Cantocorum Iubilo de Haendel, O Voso Galo Comadres, de M. Groba e Lévame.