VILAGARCIA DE AROUSA

CONCELLO
Convocan os concursos para os parques infantís da Praia de Compostela e do Parque do Castriño
O Concello vén de poñer en marcha o procedemento de licitación para a creación de dúas novas zonas de ocio e esparexemento infantil. O Diario Oficial de Galicia publica mañá a convocatoria para o subministro e instalación dunha destas áreas na Praia da Compostela e outra no Parque do Castriño. O orzamento de licitación é de 242.000 euros para cada un dos parques.

20.05.2015.- Coa creación destas dúas novas áreas de ocio infantil o goberno local da un paso máis na liña de acción que levou a cabo durante o presente mandato para mellorar e aumentar as zonas de recreo para a poboación máis nova. Para financiar os 484.000 euros que supón a realización destes dous proxectos, o Concello recorreu aos fondos do Plan Provincial de Obras e Servizos de 2015.

As empresas interesadas deberán deseñar propostas adaptadas a cada un dos contornos que se lles indican nas bases. Terán total liberdade para realizar os deseños e propoñer as instalacións ou elementos recreativos que consideren, sempre que se axusten aos criterios que se especifican. Por exemplo, deberán ser xogos axeitados para nenos de todas as idades e condicións físicas, ademais de incluír algún elemento de integración que permita ser usado por nenos con problemas de mobilidades ou minusvalías.

Os equipamentos deberán resultar estimulantes para a imaxinación infantil e servir para o desenvolvemento físico do neno.

Por suposto, todos os elementos deben cumprir coa normativa europea de seguridade tanto no que á instalación e montaxe se refire, como aos materiais, a demais de formar un conxunto homoxéneo e integrarse coa contorna.

No caso das instalacións para o Castriño, o ofertante deberá ter en conta que a proposta deberá obter a autorización da Dirección de Patrimonio da Xunta de Galicia por emprazarse na área de protección do xacemento arqueolóxico do Castro Alobre.

E no que se refire á zona da Compostela, os elementos terán que estar fabricados en materiais resistentes á exposición á intemperie nun medio mariño; valorándose en émbolos dous casos aqueles materiais que faciliten o mantemento posterior, teñen a máxima resistencia aos actos vandálicos e estean protexidos con produtos anti grafiti.

O prazo de presentación de ofertas abrirase o día seguinte á publicación do anuncio de licitación no BOP, previsiblemente a semana que ven. En calquera caso, os pregos poderanse consultar a partir do venres no perfil do contratante da web municipal.