CONSUMO
Un obradoiro de compostaxe e unha charla sobre economía circular abren o Reviravolta mañá na Praza de Abastos Reviravolta, a campaña de fomento das estratexias de economía circular organizada pola Concellería de Promoción Económica, arranca mañá con dúas actividades a desenvolver na Praza de Abastos. Un obradoiro sobre a elaboración de compostaxe e unha charla sobre economía circular estrean o programa co que o departamento que dirixe Alba Briones pretende sensibilizar e formar á cidadanía sobre o consumo responsable e o comercio de proximidade co obxectivo de acadar un modelo de desenvolvemento sostible e máis respectuoso co medio ambiente. A campaña finánciase cos fondos europeos Next Generation a través do programa “Vilagarcía Viva”.
30.05.2023.- As actividades do Reviravolta están dirixidas tanto aos praceiros como ao público en xeral e realizaranse de forma amena, práctica e accesible a todo tipo de públicos. Desenvolveranse no primeiro andar da Praza de Abastos o mércores, xoves e venres desta semana e nelas abordaranse de xeito práctico diversas temáticas de aplicación cotiá moi doadas de executar.
A primeira xornada versará sobre a economía circular e o consumo responsable. O programa ábrese ás 10 da mañá coa charla impartida por técnicos da Asociación Galicia Ambiental, que serán os encargados de ofrecer aos asistentes a información básica necesaria para favorecer unha toma de decisións consciente e responsable á hora de facer a compra. Tamén falarán da opción dos produtos de proximidade como xeito de incidir no desenvolvemento da economía local e de fomentar un desenvolvemento sostible.
E ás 11 da mañá, os mestres composteiros do Concello impartirán un obradoiro práctico sobre como reutilizar os biorresiduos que xeramos nas nosas casas para elaborar o abono ecolóxico e, á vez, reducir a cantidade de lixo que desbotamos nos contedores convencionais.
As actividades do xoves e o venres versarán sobre as técnicas de conservación e aproveitamento de alimentos, a reutilización e a compra responsable. Co Reviravolta, a concellería que dirixe Alba Briones pretende facer comprender á poboación que os pequenos xestos individuais tamén poden influír e axudar a frear eses grandes e nocivos procesos. Máis aínda, si se practican de forma xeneralizada.