DROGODEPENDENCIAS
Máis de 300 escolares reflicten en cómics as súas reflexións sobre as consecuencias do consumo de bebidas alcohólicas O SPAD de Vilagarcía vén de clausurar a última edición do seu programa de prevención do consumo de alcol entre a poboación xuvenil, que se desenvolveu durante nos meses de abril e maio nos centros de Educación Primaria dos concellos de Vilagarcía, Cambados e Meis. Algo máis de 300 escolares de 10 e 11 anos de idade participaron nos obradoiros informativos e elaboraron os cómics nos que reflectiron graficamente as conclusións obtidas a través da actividade que leva por título “TBO e non che creo”.
29.05.2023.- O programa promovido pola Área de Prevención do SPAD realizouse a través de varias sesións impartidas nos propios centros educativos por unha psicóloga. A través de actividades adaptadas ás idades do alumnado, fóiselles ofrecendo todo tipo de información sobre as consecuencias que ten o consumo de bebidas alcohólicas en idades temperás, tanto na saúde, como no comportamento de quen o consume, e a repercusión que isto pode ter, especialmente no que aos accidentes de tráfico se refire. Nas sesións tamén se abordaron os falsos mitos e crenzas erróneas que existen entre a xuventude en relación ao consumo de alcohol, como a suposta necesidade de beber para socializar ou encaixar no grupo. Tras o debate de todo o tratado nos obradoiros, os escolares reflectiron a aprendizaxe a través das viñetas dos cómics que eles meses confeccionaron, encargándose de crear as súas propias historias e ilustracións. Os colexios participantes foron o Sagrada Familia, O Piñeiriño, Escardia, Rubiáns, Vilaxoán, A Lomba, Anexo A Lomba e Arealonga (todos de Vilagarcía de Arousa); o CEIP Mosteiro (Meis) e o CEIP Corvillón (Cambados).
Comezan a beber ao 14 anos
"TBO e non che creo" é un programa da Consellería de Sanidade da Xunta de Galicia que se xustifica nos resultados obtidos na última enquisa do ESTUDES (a do ano 2021), realizada entre mozos e mozas de 14 a 18 anos. Do informe extráense datos como que o alcol é a substancia psicoactiva con maior prevalencia de consumo entre este sector da poboación, xa que o 53,6% dos participantes recoñeceu beber no último mes. A idade media de inicio en consumo é 14 anos, un dato preocupante para a saúde dos menores.