EMPREGO
Iniciados os procesos para cubrir a praza de Técnico de Normalización e crear unha bolsa de Operarios de instalacións culturais O Concello de Vilagarcía vén de poñer en marcha os procedementos para cubrir a praza de Técnico Medio de Normalización Lingüística e para crear unha bolsa de Operarios de instalacións culturais. En ámbolos dous casos as seleccións realizaranse seguindo o procedemento de concurso-oposición no que se valorarán tanto os méritos dos aspirantes, como a puntuación obtida no exame, que contará cunha proba teórica, tipo test, e un caso práctico. As bases de cada convocatoria están penduradas no apartado de Recursos Humanos da sede electrónica do Concello (sede.vilagarcia.gal). Os interesados en inscribirse nestes procesos aínda deberán esperar a que os anuncios sexan publicados no BOE, no caso da praza de Técnico de Normalización, e no BOP no da bolsa de emprego.
23.05.2023.- A praza de Técnico Medio de Normalización Lingüística corresponde á Oferta de Emprego Público realizada polo Concello de Vilagarcía no marco dos orzamentos municipais de 2022, tras quedar vacante o posto debido á xubilación do traballador que desempeñaba as funcións. Trátase dunha praza de funcionario do grupo A2 pertencente á escala de Administración Especial. Entre os requisitos específicos que se piden están contar coa Licenciatura en Filoloxía Galego-Portuguesa, Filoloxía Galega ou Filoloxía Hispánica (subsección Galego-Portugués), Grao en Lingua Galega, ou titulación en calquera outra licenciatura/grao, sempre que se dispoña do CELGA 5.
Por outra banda, o Concello de Vilagarcía recorre dende hai anos ás bolsas de emprego para cubrir as necesidades conxunturais de persoal que van tendo determinados servizos mediante a contratación de traballadores na modalidade de persoal funcionario interino. Dado que, na maioría dos casos, a necesidade é inminente (para a cobertura de baixas por enfermidade ou acumulación de tarefas en determinadas épocas), co obxectivo de axilizar os procesos de selección e contratación óptase pola creación de bolsas de emprego ás que poder recorrer. Ao estar xa realizados os exames e ter as listas de aspirantes segundo as puntuacións obtidas, a contratación é inmediata.
Os Operarios de instalacións culturais desta nova bolsa correspóndense á agrupación profesional AP grupo E.
Os interesados en concorrer a calquera destes dous procesos selectivos poden informarse dos requisitos a cumprir, temarios, sistema de avaliación e tipo de probas consultando as bases publicadas na sede electrónica do Concello de Vilagarcía.