VILAGARCIA DE AROUSA

TRÁFICO
Dr. Tourón e avenida de Cambados verán o tráfico restrinxido durante tres días polas obras de asfaltado
A avenida do Dr. Tourón e o tramo inicial da avenida de Cambados verán restrinxido o tráfico entre o luns e o mércores da vindeira semana, é dicir, os días 20, 21 e 22, como consecuencia das obras de fresado e posterior asfaltado o vial. Para non ter que pechar o trazado na súa totalidade, actuarase primeiro nun sentido e despois, no outro. En consecuencia, haberá regulación semafórica e presencial dos operarios da obra.

18.03.2023. O concello recomenda, por iso, que quen queira saír da cidade cara o Sur o faga a través da avenida de Agustín Romero, partindo da glorieta da Mariña Española, e quen queira entrar vindo dende a circunvalación ou dende Sobradelo (estrada vella a Cambados) o faga a través de Pablo Picasso, partindo da rotonda do porto (xunto ao Eroski). As dúas posibilidades estarán claramente indicadas con carteis sobre valados. O concello pide comprensión aos condutores, deixando así o único vial de Dr. Tourón para os residentes da zona, os transportes e as emerxencias.

Ao longo desta semana, a empresa que realiza os traballos rematou a reparación e ampliación das beirarrúas, que contarán con árbores e bancos, e as zonas de aparcamento. Despois de asfaltar os dous tramos das avenidas afectadas por la obra principal da rotonda que une ambas coas rúas Fontecarmoa e Vistalegre, procederase ao pintado e á sinalización vertical. Feito isto, será cando se restitúa o tramo de ciclovía tamén afectado por las obras. Segundo a planificación do concello e a empresa, na primeira semana de abril, é dicir, antes dos festivos da Semana Santa, a obra realizada nas rúas adxacentes á rotonda estará concluída e, polo tanto, a nova ordenación do tráfico, plenamente operativa.

Como se sabe, o proxecto supuxo un investimento de case 180.000 euros, aos que hai que sumar o custe do estudio técnico dunha enxeñería especializada en mobilidade, que analizou os fluxos circulatorios e propuxo a realización da rotonda desbordable. Con esta medida, mellorará a fluidez do tráfico, eliminando os semáforos existentes ata hai ben pouco e os cruces á esquerda, pero, ao tempo, gáñase en accesibilidade e seguridade, ao ampliar e humanizar as beirarrúas. Aínda estando en obras, o feito de cambiar o sentido das rúas Vistalegre, López Cuevillas e Manuel Antonio, xa facilitaron esa fluidez, o mesmo que a saída sen semáforo da rúa Fontecarmoa cara Dr. Tourón.