CONCELLO
"O Lar das Palabras" chega a Vilagarcía para promover o uso da lingua galega no ámbito familiar A sala de conferencias do Auditorio de Vilagarcía acollerá o vindeiro sábado, 3 de decembro, en horarios de 11:00 e 12:30 senllos obradoiros que baixo o título "O Lar das Palabras" teñen por obxecto a promoción do uso da lingua galega no ámbito familiar. A iniciativa, incluída no programa TeCE Redes, da Xunta de Galicia ao abeiro do Plan Xacobeo 2021-2022, está, polo tanto, dirixida a pais e nais e os seus fillos, estes con idades de 3 a 8 anos. Cada familia realizará o seu propio dicionario en galego co fin de reforzar o vínculo afectivo da familia co idioma.
26.11.2022.- O aforo é de 25 persoas por sesión. Nelas, os monitores do Lar desenvolverán diversos obradoiros con carácter moi lúdico arredor da lingua. Para asistir, os interesados deben facer unha inscrición moi sinxela: basta con cubrir unha instancia xeral na sede electrónica do concello (sede.vilagarcía.gal) especificando a actividade, a hora da función elixida (11:00 ou 12:30 horas) e o número de participantes). No caso de que o sábado non se teñan cubertas todas as prazas, poderá acceder calquera persoa por rigoroso orde de chegada. O prazo de inscrición comeza o vindeiro luns, día 28, e conclúe o venres 2 de decembro.