OBRAS E SERVIZOS
Ábrese o prazo de presentación de ofertas para executar a obra de ensanche do camiño da rúa Maceiras, en Aralde O Concello de Vilagarcía acaba de iniciar o procedemento para a contratación das obras de ensanche do camiño da Rúa Maceiras, no lugar de Aralde. O proxecto sae cun prezo de licitación de 59.310 euros (IVE incluído) e as empresas interesadas terán de prazo ata o día 26 de setembro para presentar as súas ofertas a través da plataforma pública de contratacións. A actuación inclúese no Plan Municipal de Mellora de Camiños Rurais e financiarase cunha subvención de Axencia Galega de Desenvolvemento Rural 53.984 euros aos que o Concello achegará os 7.326 que restan para completar o investimento. O prazo de execución dos traballos é de 2 meses.
06.09.2022- O proxecto prevé actuar en case o medio quilómetro de lonxitude que ten o camiño situado nunha zona rural na que se emprazan moitas explotacións agrícolas. O ensanche e mellora deste camiño permitirá facilitar o tránsito e o acceso dos vehículos agrarios que traballan as fincas, así como mellorar a seguridade viaria nesta zona.
Na actualidade este camiño secundario presenta o firme nun estado moi deteriorado con numerosas fochas que dificultan a circulación. Ademais, en épocas de choivas o estado da vía agrávase debido ás escorrentías das augas pluviais que erosionan máis o terreo e crean máis irregularidades no terreo.
Para resolverán esta situación os traballos consisten na instalación dunha rede de drenaxe das augas pluviais que contará coas correspondentes arquetas de formigón e imbornais. O camiño limparase e desbrozarase convenientemente e se varrerá o firme mediante medios mecánicos para preparar a plataforma de cara ao acabado final, no que se botará unha nova capa de rodadura. Ademais, o proxecto prevé ensanchar o camiño nas zonas onde sexa posible. Deste xeito, a vía acadará un ancho medio de 4,5 metros.