CONCELLO
A Xunta de Goberno adxudica o préstamo de 850.000 do orzamento de 2022 ao Banco Sabadell Un dos asuntos de maior relevancia que abordará a Xunta de Goberno Local na reunión deste luns será a adxudicación da operación de préstamo incluída no Orzamento Municipal de 2022 para financiar parte dos investimentos a executar durante o presente exercicio. Segundo consta na proposta da Mesa de Contratación, o crédito por importe de 850.000 euros e un prazo de amortización de 8 anos subscribirase co Banco Sabadell por reunir a súa proposta os requisitos establecidos nos pregos de licitación.
03.09.2022.- Unha vez adxudicado o préstamo na Xunta de Goberno do luns, o acordo terá que materializarse mediante a sinatura da operación coa entidade bancaria. Unha vez levado a cabo este trámite, o Concello xa poderá dispoñer dos fondos e polo tanto, sacar a licitación as obras e proxectos incluídos no Plan de Investimentos e que non se podían contratar ata que estivese pechada a operación mediante a que financialos.
As principais partidas nas que se repartirá o crédito son as destinadas á demolición do edificio da antiga Comandancia (200.000 euros), a obras de renovación, ampliación e mellora das redes de saneamento e outras infraestruturas (181.351 euros) e ás obras do Museo do Ferrocarril e complementos para o albergue (122.000). Tamén se reservan 105.667 euros para feiras e pago do IVE das actuacións da área de Mercados a financiar cos fondos europeos do Next Generation, que non inclúen este imposto. Cos fondos do Plan de Investimentos destinados á melloras no saneamento e mellora de camiños actuarse na Rúa Carballido, en Cea, na Rúa Castiñeiro, nas Bocas, e na Rúa Quinteiro, en Trabanca Sardiñeira, entre outras actuacións.
Os investimentos a realizar este ano non se limitan aos 850.000 euros do préstamo, xa que o Concello aporta outros 710.000 euros de fondos propios para completar este capítulo dos presupostos, sumando un total de 1,4 millóns de euros.