VILAGARCIA DE AROUSA

CONCELLO
Cultura renova os panos do escenario do Auditorio cun investimento de 13.000 euros
O Auditorio Municipal de Vilagarcía cumpríu19 anos de vida, case dúas décadas de funcionamento que destacan pola intensa actividade cultural que acolle e que vai en aumento ano tras anos. A pesar das pequenas actuacións de mantemento realizadas neste tempo para prolongar a vida dos equipamentos da sala, para o axeitado desenvolvemento dos espectáculos que nel se celebran faise preciso renovar os elementos escénicos básicos e principais. O proceso comezará de forma inminente coa substitución dos panos do escenario, unha mellora na que a concellería de Cultura inviste 13.000 euros.

31.08.2022.- O cambio dos panos do escenario é a actuación máis urxente que se precisa levar a cabo. Estes equipamentos conforman a cámara negra que, xunto coa iluminación, son os elementos básicos para a montaxe e desenvolvemento dos espectáculos, especialmente os de maior formato.

A Xunta Local de Goberno aprobou esta semana contratar a adquisición e montaxe dos equipamentos entre os que se inclúen os dous telóns de fondo, os dous pares de bambalinas e os catro pares de patas. O material dos panos será de tipo Moltón, mate para evitar o reflexo da luz, illante debido a súa densidade e ignífugo.

A renovación dos elementos escénicos é básica e fundamental despois de case 20 anos xa que o Auditorio de Vilagarcía é un dos máis importantes e activos de Galicia. Está integrado na Rede Galega de Teatros e Auditorios, sendo o segunda sala das cidades de ata 40.000 habitantes co maior número de butacas, 754, e a sexta das incluídas da rede. Ademais dos espectáculos que chegan a través desta programación, o Auditorio de Vilagarcía é un dos máis demandados por compañías e artistas de nivel nacional e internacional ( tanto de espectáculos teatrais, como musicais ou de ballet) que se interesan por actuar nesta importante praza e veñen por conta propia.

A maiores, a infraestrutura municipal está todo o ano a disposición dos grupos, asociacións e colectivos de Vilagarcía que tamén desenvolven as súas actuacións e espectáculos neste importante escenario.