CONCELLO
Os postos do mercado movidos de Alexandre Bóveda emprazaranse no interior da Praza da Peixería A Concellería de Promoción Económica e de Mercados do Concello de Vilagarcía informa á clientela habitual do mercado que os postos movidos da rúa Alexandre Bóveda emprazaranse no interior da Praza da Peixería, onde os poderán atopar e visitar para realizar as súas compras dende mañá, martes. Esta ubicación foi decidida polo Concello tras negarse os afectados a estudar as tres alternativas que se lles presentaron para poder proceder á apertura da rúa Alexandre Bóveda ao tráfico rodado.
29.08.2022.- A medida adoptouse considerando que o emprazamento na Peixería resultaríalles beneficioso ao poder trasladarse todos xuntos a un mesmo lugar onde xa se concentra boa parte da actividade ambulante os días de mercado, evitando así a diseminación dos postos e despistar á clientela. En calquera caso, trátase dun traslado provisional, xa que o definitivo realizarase ao remate das obras de humanización de Arcebispo Lago, lugar que acollerá parte da venta ambulante.
En canto á primeira xornada de uso compartido entre a actividade ambulante e a circulación de vehículos na Rúa Alexandre Bóveda, a experiencia desenvolveuse como era de esperar: sen incidentes de relevo e cos lóxicos despistes iniciais das persoas que descoñecían a posta en marcha da medida.
Como se anunciou nos días anteriores, a convivencia do paso de vehículos coa venta ambulante fíxose de forma progresiva, iniciándose cun único sentido de circulación en dirección saída cara Valle-Inclán, e tras ter adoptado o Concello todas as medidas necesarias para garantir a seguridade viaria: ensanches de beirarrúas, delimitación da franxa na que se sitúa a liña de postos no frontal da Praza de Abastos e a posta a disposición dos pivotes que os ambulantes poden colocar para unha maior protección.
Tamén como xa se dixo, a circulación nun único sentido manterase durante o tempo necesario para que, tanto peóns como condutores se vaian afacendo ao cambio e á convivencia. Para facilitar a transición e garantir que o mercado se desenvolve sen incidencias, a Policía Local estará presente na zona para regular o tráfico e advertir aos peóns. Será cando xa uns e outros estean habituados ao cambio, cando Alexandre Bóveda teña de abra aos dous sentidos de circulación tamén os días de mercado, como xa acontece o resto da semana.
Como se sabe, o traslado dunha das dúas liñas de postos ambulantes do mercado tívose que executar xa debido ao avanzado estado das obras de humanización de Arcebispo Lago que fan necesario habilitar a rúa Alexandre Bóveda como acceso principal do tráfico ao centro urbano de forma permanente todos os días da semana, ao nos existir outra alternativa.
O establecemento desta rúa como vía de entrada e saída de vehículos ao centro da vila era unha medida necesaria e demandada polo comercio local e os veciños da zona, decidida polo Concello no ano 2020 en base ao acordo asinado cos ambulantes e vendedores da Praza, e que se foi pospoñendo, primeiro debido á pandemia e despois el atención ás reiteradas prórrogas solicitadas polos ambulantes que acoden ao mercado.