CONCELLO
Os remanentes tamén financiarán o pump track, a gaiola de atletismo e parte da glorieta de Fontecarmoa Os 2.251.343 euros de remanente resultante dos Orzamentos Municipais de 2021, ademais de financiar a compra do solar da Comandancia e a demolición de dúas naves do peirao do Ramal (que se levan algo máis da metade da suma dispoñible), destinaranse á realización de obras, como a execución do pump track da Florida (para o que se reservan 48.388 euros), a renovación da gaiola de lanzamento das pistas de atletismo (18.136 euros), ou a completar as partidas xa reservadas para a execución da glorieta de Fontecarmoa (con 37.628 máis) ou para reforma integral do pavillón de Fontecarmoa (con outros 245.233 euros).
23.06.2022.- A distribución dos remanentes chegará a distintas concellerías con partidas de menor importe que as sinaladas anteriormente, que servirán para financiar actuacións ou programas concretos ou simplemente para incrementar os orzamentos dispoñibles polos departamentos. Así, para a Fundación de Deportes resérvanse outros 14.758 euros para obras no almacén do campo de fútbol Manuel Jiménez; Cultura, Xuventude e Promoción Económica reciben dos remanentes partidas para melloras no Auditorio, o programa de Cine na Rúa, convenios con colectivos culturais e sociais, ou programas de colaboración co comercio e a hostalaría.
No apartado de incremento orzamentario, entre outras, tamén reciben fondos as partidas dedicadas á mellora de camiños veciñais (con 15.000 euros máis), Educación (30.000), Igualdade (10.000) e a gastos correntes da Fundación de Deportes (40.000) e do Conservatorio (20.000).
A proposta de distribución dos remanentes de 2021 someteranse á aprobación do Pleno ordinario que se celebra o vindeiro xoves, 30 de xuño.