TURISMO
Vilagarcía declara o Interese Turístico Local do Atlantic Fest O Concello de Vilagarcía vén de declarar o Interese turístico local do Atlantic Fest, o festival musical que este ano se celebrará os días 15, 16 e 17 e xullo na praia da Concha. A medida foi aprobada pola Xunta de Goberno Local como consecuencia das novas directrices que está a aplicar Costas do Estado para permitir o desenvolvemento de actividades nos terreos de dominio público marítimo terrestre. O cumprimento deste requisito permitirá axilizar a autorización do organismo á realización do evento no areal vilagarciá.
25.05.2022.- A maiores da calidade dos artistas que compoñen o cartel en cada edición e do elevado número de persoas que o Atlantic Fest atrae á cidade procedente de diferentes lugares de Galicia e Portugal, entre as motivacións argumentadas para a declaración de interese turístico local deste festival destaca o seu orixinal formato, que potencia as actividades diúrnas ademais dos concertos de noite, co que ten un efecto dinamizador da zona; que inclúe un programa multidisciplinar no que teñen cabida música, literatura, deporte, exposicións e actividades de ocio e medioambiente; e pensado para as familias, con oferta tanto para o público infantil como adulto.
Ademais, na proposta sinálanse outros méritos que xustificarían a declaración de interese turístico local, como os recoñecementos que ten acadado o Atlantic Fest dende a súa creación en 2016, así como o impacto que ten na economía da comarca, e que se estima en 1.8 millóns de euros.