CULTURA
O programa das Letras Galegas colle temperatura co festival folclórico e a homenaxe dos escolares a Florencio Delgado A programación conmemorativa do Día das Letras Galegas elaborada pola Concellería de Cultura colle temperatura estes días como adianto aos grandes actos a celebrar o martes, 17 de maio. A modo de petisco, a música e o baile tradicionais galegos saltan a escena o domingo, e o luns, escolares de varios centros educativos do municipio protagonizarán un acto conxunto de homenaxe a Florencio Delgado Gurriarán, autor ao que se dedica este ano o Día das Letras.
14.05,2022,- A Praza da II República será o escenario elixido para acoller o XIV Festival Nós de Sobradelo, que se desenvolverá o domingo a partir das 19.00 horas. A agrupación folclórica vilagarcián representará o repertorio dos seus grupos oficiais e escolas de baile, canto, gaita e percusión. Como é habitual no festival de Nós, o espectáculo contará coa intervención dun convidado, neste caso o grupo de baile e música tradicional Sadeo de Ponteareas. A entrada ao festival folclórico é libre e de balde. En caso de chuvia, a actividade trasladaríase ao interior do Auditorio.
Xa o luns, os actos das Letras Galegas trasladaranse á Praza de Galicia onde, entre as 11 e as 13.00 horas levarase a cabo un acto literario protagonizado por alumnos dos colexios O Piñeiriño, San Francisco, A Lomba e IES Castro Alobre. En caso de choiva, os actos tamén se trasladarían ao Auditorio.