VILAGARCIA DE AROUSA

MULLER
Igualdade organiza o programa “Enredadas” para previr a soidade e favorecer as relacións sociais de mulleres maduras
A Área de Igualdade do Concello de Vilagarcía pon en marcha este mes unha nova iniciativa destinada a promover a madurez activa e saudable de mulleres de máis de 55 anos. Trátase do programa “Enredadas”, que busca previr a soidade creando un espazo que favoreza as relacións sociais e no que se traballen aspectos como o empoderamento ou a autoestima. A actividade porase en marcha de forma experimental en Cornazo, coa realización de sete sesións nas que participarán as mulleres rurais da asociación Os Borrizos.

11.05.2022.- “Enredadas” diríxese preferentemente a mulleres das contornas rurais xa que estas zonas, debido ás súas características, con vivendas unifamiliares, ás veces algo distantes as unhas das outras, e afastadas dos centros urbanos, son máis dadas a xerar situacións de illamento e soidade das persoas que poden vivir soas ou pasan moito tempo ao día sen contacto con outras. Para iso, o programa ten como finalidade mellorar as condicións de vida das mulleres maduras perante a potenciación das relacións e da participación social, reducindo así o impacto que pode provocar a soidade.

A través desta intervención proporcionarase un espazo de aprendizaxe, coidado, apoio e empoderamento que permita ás participantes afrontar os conflitos emocionais con asertividade, tomar decisións con seguridade e unha maior automomía persoal, o que lles permitirá gozar dun xeito máis saudable das súas vidas.

O “Enredadas” desenvolverase ao longo sesións grupais para que as mulleres participen en conxunto en actividades que as afasten da soidade e favorezan o establecemento de redes de apoio entre elas. Todas as actuacións terán un transfondo lúdico, traballando con xogos e dinámicas e utilizando a risoterapia e os exercicios de relaxación. Nesta experiencia piloto realizaranse sete sesións de hora e media de duración cada unha, cun formato presencial e cunha metodoloxía activa, participativa, integradora e flexible.

O departamento que dirixe Tania García contratou a impartición deste programa a profesionais da firma Talenta-Soluciones para Empresas y Personas por importe de 1.206 euros. O contrato aprobouse na Xunta de Goberno Local desta semana.