EDUCACIÓN
Concello e CEMMA sensibilizan a alumnos de 3º da ESO sobre o coidado e respecto ás especies mariñas ameazadas na ría A Concellería de Educación do Concello de Vilagarcía organiza unha nova campaña de sensiblización e educación ambiental, neste caso destinada a alumnos de Secundaria do municipio. A través dunhas xornadas informativas impartidas en colaboración coa CEMMA, a Coordinadora para o Estudo dos Mamíferos Mariños, informarase e tratará de aumentarse a sensibilidade ambiental e social dos estudantes de 3º curso da ESO en relación ao medio mariño e ás especies ameazadas e protexidas que habitan as nosas rías e que deben ser respectadas e debidamente coidadas.
23.04.2022.- Segundo os datos que manexa a CEMMA, nas augas marítimas de Galicia están documentada a presenza de 23 especies de cetáceos, 5 de lobos mariños e outras 5 de tartarugas. Anualmente prodúcense nas nosas costas unha media de 265 exemplares varados, dos que un 10% están aínda vivos e son susceptibles de ser reintroducidos ou rehabilitados para ser devoltos en bo estado ao medio mariño. Moitos destes animais vense involucrados en interaccións con faenas pesqueiras, causando un gran número de capturas accidentais, sendo esta unha das maiores causas de mortes e varamentos.
O proxecto promovido polo departamento que dirixe Miro Serén ofertouse a todos os centros de Secundaria do municipio, téndose inscrito ata o momento o Castro Alobre, o Sagrada Familia e o Miguel Ángel González Estévez. As sesións desenvolveranse en ditos centros a principios do mes de maio, de xeito gratuíto para os centros, a onde se desprazará persoal do CEMMA para impartir a actividade apoiándose en materiais audiovisuais adaptados para estas idades.