CONCELLO
O Concello adxudica os traballos de retirada da cruz falanxista e de restauración da fachada da igrexa de Santa Baia A cruz falanxista en homenaxe a José Antonio Primo de Rivera e dos "caídos" do bando nacional que preside un lateral da fachada da igrexa parroquial de Vilagarcía ten os días contados. En cumprimento da Lei da Memoria Histórica e despois de trámites e obstáculos que se prolongaron durante anos, o Concello acaba de aprobar a adxudicación dos traballos de retirada da cruz e dos elementos que a acompañan, así como a posterior restauración da fachada do templo de Santa Baia cun orzamento total de 10.610 euros, dos cales 5.916 fináncianse cunha subvención da Deputación.
15.01.2022.- Os traballos, que levará a cabo a restauradora vilagarcián Iria López –que tamén se encargou da limpeza dos leóns e xerras do Concello e do arranxo da fonte da Praza de Rafael Pazos, entre outras labores- iniciaranse de xeito inmediato.
A Igrexa de Santa Baia de Arealonga é un edificio catalogado como ben patrimonial e arquitectónico a protexer. Por esta razón, calquera actuación sobre el debe ser revisada e autorizada pola Dirección Xeral de Patrimonio da Xunta de Galicia. Neste caso, o departamento autonómico revalidou en abril do ano pasado o permiso concedido en 2004 para retirar a cruz, traballos que naquel momento non se levaron a cabo por faltar a autorización do Arcebispado. Nestes momentos xa se conta tamén con ese permiso, o goberno local xa falou co párroco para comunicarlle os plans e tamén se volveu a dirixir a Patrimonio para informar da intención de iniciar os traballos canto antes.