VILAGARCIA DE AROUSA

DESENVOLVEMENTO LOCAL
Castes 2021 inclúe unha Wine Party que confía en que sexa o xerme dun futuro festival arredor do viño
Castes, a feira independente do viño, regresa este ano a Vilagarcía nun formato moi reducido á espera de que nunha vindeira edición poida retomar a presenza de máis bodegas e máis público nun espazo máis amplo. Nesta ocasión, regresa ao orixe: a vinoteca Derby. Aos túneles do viño e as catas verticais xa anunciadas, agora súmase unha Wine Party, o vindeiro domingo, que maridará viño e música e que o seu promotor, Sito Dieste, confía en que sirva de xerme para un futuro festival arredor destas dúas artes.

26.11.2021. Castes 2021, que en 2019 recibiu o premio Magnum á mellor iniciativa enoturística de Galicia, se celebrará o domingo 28 e o luns 29. Arredor de 25 bodegas, a maior parte delas unicamente da comunidade galega, fronte a presenza de varios países nas edicións anteriores, a causa pandemia, participarán nos dous túneles do viño e tres delas, nas denominadas catas verticais. Estas consisten en facer unha cata de distintas añadas dun mesmo viño para coñecer a súa evolución. Todas as bodegas teñen a característica común de que encaixan no concepto de vigneron, é dicir, a dun viticultor que tamén é vinicultor, que controla todo o proceso dende o coidado da viña ata que esta se transforma en viño, o que normalmente confire moita personalidade ao produto final.

Ademais das novidades propias da situación pandemia, este ano Castes inclúe outra: unha maridaxe entre viño e música. Será o domingo, entre as 13:00 e as 17:00 horas, na rúa Méndez Núñez, nun espazo enogastronómico compartido polo Derby, promotor do Castes, e o Bar Miúdo. Os asistentes poderán desfrutar de viños de alta calidade e, ao tempo, da música de El Club de la Acidez, unha banda de jazz e blues formada exprofeso para esta ocasión e liderada polo músico vilagarcián Nacho Pérez. Sito Dieste, artífice do Castes, confía en que esta Wine Party sirva de xerme para dar un novo pulo ao certame a partir do ano que vén.