OBRAS E SERVIZOS
Vilagarcía incorpora lámpadas solares ao alumeado de Nadal O Concello de Vilagarcía vén de incorporar lámpadas de alimentación solar á iluminación de Nadal coa que este ano se están a decorar os espazos públicos da cidade. A novidade aplícase inicialmente nalgunhas das árbores que engalanan as rúas e os xardíns efémeros, coa idea de ir implementando este sistema de iluminación ecolóxico e barato nas vindeiras campañas de decoración que executa de forma directa o Concello como complemento á iluminación que se aluga anualmente para engalanar as rúas.
26.11.2021.- A medida ten como obxectivo aforrar custes enerxéticos e seguir apostando por sistemas alternativos e respectuosos co medio ambiente, xa que as lámpadas non consumen electricidade. Ao alimentarse coa luz solar que acumulan durante as horas do día, aluman perfectamente sen necesidade de estar conectadas a ningunha instalación eléctrica pila ou batería.
A árbore de Nadal que preside a Praza da II república é un dos elementos dotado destas lámpadas solares.
Mellora lumínica para os peóns da Baldosa Por outro lado, a zona de viños da Baldosa estreou onte o novo alumeado público. Os antigos farois fixados ás fachadas dos edificios veñen de substituírse por catenarias colgantes de forma circular. O cambio permite optimizar a iluminación e centrala nos viandantes, xa que a colocación das lámpadas circulares no eixo central da rúa, ilumina a zona de tránsito dos peóns en lugar das terrazas, que era o que acontecía cos farois de fachada.
As luminarias tamén son de tecnoloxía led o que permite que, aportando a mesma intensidade lumínica, se poida reducir o consumo eléctrico, xa que a potencia pasa dos 1.300 watios que necesitaban os antigos farois, aos 180 cos que funcionan estas. O uso deste tipo de catenarias colgantes, que destacan polo seu deseño moderno, está moi estendido en zonas peonís dos países nórdicos.