MULLER
”Mulleres en Acción: Violencia Zero” regresa o martes Vilagarcía co espectáculo sonoro “Libre” A Deputación de Pontevedra, en colaboración coa Área de Igualdade do Concello de Vilagarcía, organiza a acción titulada "Libre" dentro do Proxecto Mulleres en Acción: Violencia Zero. O espectáculo terá lugar o próximo martes 28 de setembro ás 12.00 horas na Praza de Galicia e consistirá nunha acción sonora protagonizada pola violoncelista Macarena Montesinos. Por tratarse dunha actividade de concienciación cara unha sociedade igualitaria e sen violencia de xénero, o Concello convidou aos centros educativos do municipio a asistir a este acto.
24.09.2021.- “Libre” é unha acción sonora creada exprofeso para Violencia Zero pola improvisadora Macarena Montesinos, que encontra na arte a maior forma de liberdade e que estuda a relación e as correspondencias que existen entre as partituras gráficas e a improvisación sonora. Para a súa posta en escena o martes na Praza de Galicia contarase cun aforo limitado a 100 persoas e cumprirase toda a normativa vixente de protocolos anti covid.
Mulleres en acción. Violencia Zero é un proxecto de acción artística que a Deputación en colaboración cos concellos da provincia leva desenvolvendo dende o ano 2015 en espazos públicos. Estas accións funcionan como arma de visibilización e de reflexión para promover unha sociedade igualitaria entre homes e mulleres, na que non exista a discriminación nin a violencia.